اسلام آباد (اے بی این نیوز    ) ملک بھر میں سیمنٹ کی قیمتوں میں ایک بار پھر اضافہ ریکارڈ کیا گیا ہے، جس کے باعث تعمیراتی لاگت میں مزید دباؤ آنے کا خدشہ ظاہر کیا جا رہا ہے۔ گزشتہ ایک ہفتے کے دوران سیمنٹ کی فی بوری قیمت میں 10 روپے تک اضافہ دیکھا گیا ہے۔

پاکستان بیورو برائے شماریات کے مطابق 11 دسمبر کو ختم ہونے والے ہفتے میں ملک کے شمالی شہروں میں سیمنٹ کی فی بوری اوسط ریٹیل قیمت 1389 روپے رہی، جو پیوستہ ہفتے کے مقابلے میں 0.70 فیصد زیادہ ہے۔ اس سے قبل شمالی علاقوں میں سیمنٹ کی اوسط قیمت 1379 روپے ریکارڈ کی گئی تھی۔

اسی طرح جنوبی شہروں میں بھی سیمنٹ کی قیمتوں میں اضافہ ہوا ہے۔ اعداد و شمار کے مطابق 11 دسمبر کو ختم ہونے والے ہفتے میں جنوبی شہروں میں سیمنٹ کی فی بوری اوسط ریٹیل قیمت 1445 روپے رہی، جو گزشتہ ہفتے کے مقابلے میں 0.29 فیصد زیادہ ہے۔ پیوستہ ہفتے میں جنوبی علاقوں میں سیمنٹ کی اوسط قیمت 1441 روپے تھی۔

شہری سطح پر قیمتوں کی تفصیل کے مطابق اسلام آباد میں سیمنٹ کی فی بوری اوسط قیمت 1367 روپے، راولپنڈی 1361، گوجرانوالہ 1420، سیالکوٹ 1400، لاہور 1488، فیصل آباد 1380، سرگودھا 1397، ملتان 1397، بہاولپور 1400، پشاور 1370 اور بنوں میں 1300 روپے ریکارڈ کی گئی۔دوسری جانب جنوبی شہروں میں کراچی میں سیمنٹ کی فی بوری اوسط قیمت 1378 روپے، حیدرآباد 1428، سکھر 1525، لاڑکانہ 1407، کوئٹہ 1490 اور خضدار میں 1443 روپے رہی۔

مزید پڑھیں :مسلم خاتون کا نقابب کیوں کھینچا ،راکھی ساونت کا بہار کے وزیر اعلیٰ سے بڑا مطالبہ