اسلام آباد ( اے بی این نیوز )محکمہ موسمیات کے مطابق ملک کے بالائی اور وسطی علاقوں میں بارشوں اور برف باری کا نیا سلسلہ شروع ہو رہا ہے، جو مختلف علاقوں میں موسم کی شدت بڑھا سکتا ہے۔ایڈوائزری میں بتایا گیا ہے کہ13 دسمبر سے مغربی ہوا کا سسٹم ملک میں داخل ہوگا، جس کے باعث بارش اور برف باری کا امکان ہے۔
14 اور 15 دسمبر کو اسلام آباد، راولپنڈی، مری، گلیات، کشمیر، گلگت بلتستان، خیبر پختونخوا اور پنجاب کے بالائی علاقوں میں بارش اور پہاڑوں پر برف باری متوقع ہے۔بلوچستان کے کچھ علاقوں میں بھی ہلکی بارش اور تیز ہواؤں کا امکان ظاہر کیا گیا ہے۔
15 سے 16 دسمبر کے دوران پنجاب کے وسطی اور جنوبی علاقوں میں بھی بادل برس سکتے ہیں۔محکمہ موسمیات نے شہریوں، مسافروں اور متعلقہ اداروں کو احتیاطی تدابیر اختیار کرنے کی ہدایت کی ہے:
پہاڑی علاقوں میں لینڈ سلائیڈنگ کا خطرہ بڑھ سکتا ہے۔سیاح مری اور شمالی علاقوں کا سفر موسم کی صورتحال دیکھ کر کریں۔نالہ لئی اور نشیبی علاقوں میں پانی جمع ہونے کا امکان موجود ہے۔محکمہ زراعت نے کسانوں کو فصلوں کی حفاظت کے لیے پیشگی اقدامات کا مشورہ دیا ہے۔
سردی کی شدت میں اضافے کے پیشِ نظر عوام کو گرم کپڑوں کے استعمال اور ضروری موسم سرما کی تیاری کا مشورہ دیا گیا ہے۔محکمہ موسمیات نے مزید تفصیلات اپنی ویب سائٹ اور موبائل ایپ کے ذریعے حاصل کرنے کی ہدایت بھی کی ہے۔
خیبر پختونخوا کے بالائی علاقوں میں بارش اور برف باری کی پیشگوئی کے بعد صوبائی ڈیزاسٹر مینجمنٹ اتھارٹی نے موسم کی صورتحال کے پیش نظر الرٹ جاری کر دیا ہے۔
پی ڈی ایم اے کے مطابق چترال، دیر، سوات، شانگلہ، مانسہرہ اور ایبٹ آباد سمیت مختلف پہاڑی اضلاع میں بارش اور برف باری کا امکان ہے۔ اسی طرح مہمند، خیبر، شمالی اور جنوبی وزیرستان میں بھی موسم تبدیل ہونے کی پیش گوئی کی گئی ہے۔
اتھارٹی نے خبردار کیا ہے کہ موٹر ویز اور ہائی ویز پر دھند کے باعث ٹریفک متاثر ہوسکتی ہے، اس لیے مسافر احتیاط سے سفر کریں اور غیر ضروری نقل و حرکت سے گریز کریں۔ متعلقہ اداروں کو نکاسی آب کے نظام کو فعال رکھنے کی ہدایات بھی جاری کر دی گئی ہیں۔
پی ڈی ایم اے نے دریاؤں، ندی نالوں اور برساتی چشموں کے قریب رہنے والوں کو محتاط رہنے کا مشورہ دیا ہے۔ شہریوں کو ہدایت کی گئی ہے کہ بارش، تیز ہوا یا ژالہ باری کے دوران بجلی کے کھمبوں اور تاروں سے دور رہیں، جبکہ لینڈ سلائیڈنگ کے خدشے والے علاقوں میں غیر ضروری سفر نہ کریں۔
صوبائی حکام نے کہا ہے کہ موسم کی صورتحال پر مسلسل نظر رکھی جا رہی ہے اور کسی بھی ہنگامی صورت میں امدادی سرگرمیاں فوری شروع کی جائیں گی۔
مزید پڑھیں :انتخابی شیڈول جاری
