اسلام آباد (اے بی این نیوز) حکومت نے بجلی صارفین کو معمولی ریلیف دیتے ہوئے فی یونٹ قیمت میں کمی کر دی۔
نیشنل الیکٹرک پاور ریگولیٹری اتھارٹی (نیپرا ) نے بجلی کی قیمت میں کمی کا نوٹیفکیشن جاری کردیا۔
نیپرا نوٹیفکیشن کے مطابق بجلی کی قیمت میں ایک ماہ کیلئے 88پیسے فی یونٹ کمی کردی گئی ہے، بجلی کی قیمتوں میں کمی کا اطلاق کے الیکٹرک سمیت ملک بھر کے صارفین پر ہو گا۔
نوٹیفکیشن کے مطابق صارفین کو آئندہ ماہ کے بجلی بلوں میں ریلیف ملے گا، قیمتوں میں کمی کا اطلاق لائف لائن صارفین اور الیکٹرک وہیکلز چارجنگ اسٹیشنز پر نہیں ہو گا، صارفین کو دسمبر کے بلوں میں ریلیف دیا جائے گا۔
دوسری جانب حکومت نے ملک میں صنعتی شعبے کیلئے اہم فیصلہ کیا ہے، حکومتی ریفرنس پر نیپرا نے اضافی بجلی کی کھپت پر رعایتی نرخ منظور کر لیے، نیپرا کا فیصلہ وفاقی حکومت کو موصول ہو گیا۔
اعلامیہ میں بتایا گیا کہ صنعتوں کا اضافی بجلی کی کھپت پر 22روپے 98 پیسے فی یونٹ چارج ہو گا، پاور ڈویژن کی جانب سے نیپرا کے فیصلے کا خیر مقدم کیا گیا ہے، پاور ڈویژن نے نوٹیفکیشن کے حوالے سے اقدامات شروع کر دیے۔
اعلامیہ میں مزید کہا گیا کہ صنعتی پیکیج سے گھریلو اور کمرشل صارفین متاثر نہیں ہوں گے ، پاور ڈویژن کے نوٹیفکیشن کے بعد پیکیج کا اطلاق ہو گا۔
وزیر توانائی سردار اویس لغاری نے کہا ہے کہ صنعتی پیکیج سے ملک میں صنعتی و زرعی سرگرمیوں کو فروغ ملے گا ، پیکیج سے پیداواری سرگرمیوں کو فروغ اور روزگارکے اضافی مواقع دستیاب ہوں گے ،تین سالہ پیکیج سے انڈسٹریل سیکٹر مستقبل کی بہتر منصوبہ بندی کر سکے گا۔
ان کا مزید کہنا تھا کہ ڈیٹا سینٹر اور کرپٹو مائننگ آپریشنز سمیت گرین فیلڈ صنعتیں بھی مستفید ہوں گی۔
مزید پڑھیں۔مسلم لیگ ن کے سابق یوسی چیئرمین عامر فاروق پر قاتلانہ حملہ، دو بھائی اور بھتیجا زخمی ہوگئے
