اسلام آباد (اے بی این نیوز) پاکستان پیپلزپارٹی کے چیئرمین بلاول بھٹو زرداری نے کہا ہے کہ افغانستان کی سرزمین بدستور دہشتگردی کے لیے استعمال ہو رہی ہے اور پاکستان ایک ہی وقت میں دہشتگرد گروہوں اور دشمن ممالک کی سازشوں کا مقابلہ کر رہا ہے۔ملک کو موجودہ مشکلات سے نکالنا ہوگا۔
ایک تقریب سے خطاب میں بلاول بھٹو نے کہا کہ پیپلزپارٹی نے موجودہ حکومت کے ساتھ مل کر 27ویں آئینی ترمیم منظور کرائی تاکہ سیاسی بحران کا حل نکالا جا سکے۔ ان کا کہنا تھا کہ ملک کو موجودہ مشکلات سے نکالنے کے لیے سیاسی استحکام ناگزیر ہے۔
بلاول بھٹو نے کہا کہ مادرِ وطن کو مضبوط کرنا پیپلزپارٹی کا بنیادی نظریہ ہے اور وہ نہیں چاہتے کہ اندرونی لڑائیوں کا فائدہ دشمن اٹھائے۔ انہوں نے الزام عائد کیا کہ کچھ عناصر آئینی عدالت کو متنازع بنانے کی کوشش کر رہے ہیں، جب کہ آئینی عدالت کے ججوں کے کندھوں پر بہت بڑی ذمہ داری ہے۔
انہوں نے واضح کیا کہ قانون سازی پارلیمان کا اختیار ہے اور کسی کو اس کام میں مداخلت نہیں کرنے دی جائے گی۔ انہوں نے مثال دیتے ہوئے کہا کہ ایسی عدالت نہیں بننی چاہیے جو محض خط نہ لکھنے پر وزیر اعظم کو نااہل قرار دے دے۔
بلاول بھٹو نے کہا کہ حکومت این ایف سی ایوارڈ کے ذریعے صوبوں کو ملنے والے حقوق محدود کرنا چاہتی تھی، لیکن پیپلزپارٹی نے اس کی مخالفت کی۔ انہوں نے کہا کہ 18ویں ترمیم نے علیحدگی پسند قوتوں کے راستے روکے۔
اپنے خطاب میں انہوں نے کہا کہ پاکستان تمام چیلنجز کا مقابلہ کرنے کی صلاحیت رکھتا ہے۔ “ہم مل کر مودی کا مقابلہ کریں گے، کشمیر سے بلوچستان اور گلگت سے سندھ تک تمام سازشیں ناکام بنائیں گے۔”
بلاول بھٹو نے بھارتی وزیر دفاع کے سندھ سے متعلق بیان کو بھی غلط اور مداخلت پر مبنی قرار دیا۔
مزید پڑھیں :مولانا فضل الرحمان نے حکومت کیخلاف تحریک چلانے کا عندیہ دیدیا
