تہران( اے بی این نیوز)ایران نے ویزے نہ ملنے پر فیفا ورلڈ کپ 2026 کے ڈرا کے بائیکاٹ کا اعلان کر دیا۔
غیر ملکی خبر رساں ایجنسی کے مطابق ایرانی فٹبال فیڈریشن کے ترجمان عامر مہدی علوی نے کہا ہے کہ امریکا کی جانب سے ویزے نہ ملنے کی وجہ سے فیفا ورلڈ کپ 2026 کی قرعہ اندازی میں شرکت نہیں کریں گے۔
انہوں نے کہا کہ امریکی حکام نے ٹیم کے ہیڈ کوچ سمیت صرف 4 آفیشلز کو ویزے جاری کیے ہیں۔ جبکہ فیڈریشن کے صدر مہدی تاج کو ویزا دینے سے انکار کر دیا۔
عامر مہدی نے امریکا کے فیصلے کو کھیلوں کے اصولوں کی کھلی خلاف ورزی قرار دیا۔ اور اپنے بائیکاٹ کے فیصلے سے فیفا کو بھی آگاہ کر دیا۔
یہ بھی پڑھیں: اوور 40 ٹی20 ورلڈ کپ، پاکستان امریکا کو شکست دے کر فائنل میں پہنچ گیا
واضح رہے کہ فیفا ورلڈ کپ 2026 کی قرعہ اندازی 5 دسمبر کو واشنگٹن میں ہو رہی ہے۔ اور ایران نے مارچ میں فیفا ورلڈ کپ 2026 کے لیے کوالیفائی کر لیا تھا۔
مزید پڑھیں:پی ٹی آئی نے موٹروے بند کرنے کا اعلان کر دیا
