اسلام آباد( اوصاف نیوز)پاکستان میں یکم دسمبر 2025 سے اگلے 15 دنوں کے لیے پیٹرولیم مصنوعات کی قیمتوں میں نمایاں کمی متوقع ہے۔
انڈسٹری اور حکومتی ذرائع کے مطابق یکم دسمبر سے 6.35 روپے فی لیٹر تک کمی متوقع ہے۔
متوقع ریلیف کو عالمی سپلائی میں اضافے کی وجہ قرار دیا جا رہا ہے، جو خلیجی خطے کے سب سے بڑے ریفائننگ کمپلیکس میں سے ایک کویت کی الزور ریفائنری کے کئی یونٹس کی بحالی کے بعد ممکن ہوا ہے۔
13 دن کے اعداد و شمار پر مبنی ابتدائی حسابات کے مطابق پیٹرول کی قیمت میں 3 روپے 70 پیسے فی لیٹر کمی کا امکان ہے جس کے بعد پیٹرول کی فی لیٹر قیمت 265 روپے 45 پیسے سے کم ہو کر 261 روپے 75 پیسے فی لیٹر ہو سکتی ہے۔
دوسری جانب ہائی اسپیڈ ڈیزل کی قیمت میں 4.28 روپے فی لیٹر کمی کا امکان ہے جس کے بعد قیمت 284.44 روپے سے کم ہو کر تقریباً 280.16 روپے فی لیٹر ہو سکتی ہے۔
مٹی کے تیل کی قیمت میں معمولی کمی متوقع ہے، یعنی 0.73 روپے کمی کے بعد مٹی کے تیل کی قیمت 194.34 روپے سے کم ہو کر 193.61 روپے فی لیٹر ہو سکتی ہے۔
ذرائع کے مطابق لائٹ ڈیزل آئل کی قیمت میں سب سے زیادہ کمی متوقع ہے، 6 روپے 35 پیسے فی لیٹر کمی کے بعد اس کی قیمت 170 روپے 80 پیسے سے کم ہو کر 164 روپے 45 پیسے فی لیٹر ہو جائے گی۔
مزید پڑھیں:عالمی سافٹ ویئر مسئلے نے پی آئی اے کے طیاروں کو مشکل میں ڈال دیا
