جھنگ (اے بی این نیوز) جھنگ میں پیش آنے والے ایک دلخراش واقعے میں سابق صدر ڈسٹرکٹ بار ایسوسی ایشن ایڈووکیٹ منیر احمد سدھانہ سمیت 3 افراد قاتلانہ حملے میں جاں بحق ہوگئے۔
واقعہ اس وقت پیش آیا جب ایڈووکیٹ منیر احمد اپنی گاڑی میں سفر کر رہے تھے کہ اچانک دو نامعلوم موٹر سائیکل سواروں نے ان کی گاڑی پر اندھا دھند فائرنگ کر دی۔
عینی شاہدین کے مطابق حملہ انتہائی مہارت اور منصوبہ بندی کے ساتھ کیا گیا، فائرنگ کے نتیجے میں گاڑی کا ڈرائیور موقع پر ہی دم توڑ گیا جبکہ ایک نامعلوم راہگیر بھی گولیوں کا نشانہ بن کر جان کی بازی ہار گیا۔
ایڈووکیٹ منیر احمد سدھانہ کو شدید زخمی حالت میں فوری طور پر ٹراما سینٹر منتقل کیا گیا، تاہم وہ زخموں کی تاب نہ لاتے ہوئے جان کی بازی ہار گئے۔ طبی عملے کے مطابق انہیں متعدد گولیاں لگی تھیں، جس کی وجہ سے ان کی حالت انتہائی نازک تھی۔
دوسری جانب پولیس نے موقع پر پہنچ کر شواہد اکھٹے کر لیے ہیں، واقعے کو ٹارگٹ کلنگ قرار دیا جا رہا ہے، انسپکٹر جنرل پنجاب نے واقعے کا نوٹس لیتے ہوئے ملزمان کی فوری گرفتاری کا حکم دے دیا۔
شہر کی اہم شخصیات، وکلاء برادری اور سول سوسائٹی نے واقعے کی شدید مذمت کرتے ہوئے اسے قانون کی بالادستی پر حملہ قرار دیا ہے۔
ایڈووکیٹ منیر احمد سدھانہ جھنگ کی قانونی برادری میں ایک باوقار مقام رکھتے تھے، ان کی اچانک موت نے اہلِ علاقہ اور وکلاء برادری کو گہرے صدمے میں مبتلا کر دیا۔
مزید پڑھیں۔پیٹرولیم مصنوعات کی قیمتوں میں بڑی کمی کا امکان
