لاہور ( اے بی این نیوز )ضمانت کے باوجود یوٹیوبر سعد الرحمان، المعروف ڈکی بھائی، آج جیل سے باہر نہ آسکے جس کی وجہ روبکار جاری نہ ہونا بتائی گئی۔ وکیل کے مطابق ضروری دستاویزات جمع نہ ہونے کے باعث رہائی مؤخر ہوئی، تاہم توقع ہے کہ وہ کل تک رہا ہو جائیں گے۔
معروف یوٹیوبر کو سوشل میڈیا پر نازیبا مواد اپ لوڈ کرنے اور غیر قانونی جوئے کی ایپس کی تشہیر کے الزامات میں گرفتار کیا گیا تھا۔ لاہور ہائیکورٹ نے پیر کے روز دس لاکھ روپے کے مچلکوں کے عوض ان کی ضمانت منظور کی، جسٹس شہرام سرور نے دلائل سننے کے بعد رہائی کا حکم جاری کیا تھا۔
ڈکی بھائی پر الزام ہے کہ انہوں نے اپنے یوٹیوب چینل کے ذریعے غیر قانونی بیٹنگ ایپس کو فروغ دیا، جس پر 17 اگست کی رات لاہور کی نیشنل کرائم ایجنسی نے ریاست کی مدعیت میں ایف آئی آر درج کی۔ اس دوران ایک الگ مقدمہ بھی سامنے آیا جس میں ڈکی بھائی کی اہلیہ اروب جتوئی کی درخواست پر سائبر کرائم کے 9 افسران کے خلاف کارروائی ہوئی۔ ان پر الزام ہے کہ انہوں نے نہ صرف ڈکی بھائی کو مقدمے میں گرفتار کیا بلکہ مبینہ طور پر کروڑوں روپے رشوت لی اور ان کے اکاؤنٹس سے ڈالر اپنے اکاؤنٹس میں منتقل کیے۔ڈکی بھائی کی رہائی اب روبکار جاری ہونے سے مشروط ہے۔
مزید پڑھیں :تعلیمی اداروں میں موسم سرما کی چھٹیوں کا اعلان
