لاہور (اے بی این نیوز) ممتاز گجراتی سیاسی شخصیت اور مسلم لیگ ن کے سابق رکن قومی اسمبلی نوابزادہ مظہر علی خان 94 برس کی عمر میں انتقال کر گئے۔
اہل خانہ کے مطابق وہ گزشتہ کئی روز سے لاہور کے نجی اسپتال میں زیر علاج تھے جہاں طویل علالت کے بعد ان کا انتقال ہوگیا۔ ان کی موت کی خبر سے گجرات اور گردونواح میں گہرے دکھ اور سوگ کی فضا پیدا ہو گئی ہے۔
خاندانی ذرائع کا کہنا ہے کہ مرحوم کی نماز جنازہ کل سہ پہر 3 بجے ان کے آبائی گاؤں اجنالہ میں ادا کی جائے گی جس میں سیاسی، سماجی اور مقامی شخصیات کی بڑی تعداد کی شرکت متوقع ہے۔ علاقے میں نوابزادہ خاندان کے اثرورسوخ کے باعث جنازے میں لوگوں کی بڑی تعداد کی شرکت متوقع ہے۔
نوابزادہ مظہر علی خان گجراتی سیاست میں نمایاں مقام پر فائز تھے۔ وہ نہ صرف اپنے علاقے کے لوگوں کی فلاح و بہبود کے لیے سرگرم رہے بلکہ صوبائی اور قومی سطح پر بھی خدمات سرانجام دیں۔
انہوں نے اپنے سیاسی کیریئر کا آغاز صوبائی سطح سے کیا اور ایک بار پنجاب اسمبلی کے رکن منتخب ہوئے۔ بعد ازاں 2013 کے عام انتخابات میں وہ مسلم لیگ (ن) کے ٹکٹ پر رکن قومی اسمبلی منتخب ہوئے اور اپنے حلقے کے مسائل کو اجاگر کرنے میں اہم کردار ادا کیا۔
مرحوم ایک مدبر سیاست دان، ایک ہمدرد رہنما اور ملنسار شخصیت سمجھے جاتے تھے۔ ان کی عوامی خدمات کو علاقہ مکین آج بھی سراہتے ہیں۔ ان کی موت سے گجرات کی سیاست ایک اہم رہنما سے محروم ہو گئی ہے۔
مزید پڑھیں۔ستاروں کی روشنی میں آپ کا آج (پیر) کا دن کیسا رہے گا ؟
