لاہور( اے بی این نیوز)ڈرائیونگ لائسنس بنوانے والوں کی بڑی مشکل آسان ہوگئی ، شہری اب شہر کے مختلف ناکوں پر ہی لرنر پرمٹ حاصل کر سکیں گے۔
اسلام آباد ٹریفک پولیس نے ڈرائیونگ لائسنس مہم کے دوسرے مرحلے کا آغاز کر دیا ہے، جس کے تحت شہری اب شہر کے مختلف ناکوں پر ہی لرنر پرمٹ حاصل کر سکیں گے۔
یہ اقدام انسپکٹر جنرل اسلام آباد پولیس کی ہدایت پر کیا گیا، اس حوالے سے چیف ٹریفک آفیسر (سی ٹی او) حمزہ ہمایوں نے بتایا کہ خصوصی فیسلیٹیشن وینز زیرو پوائنٹ، فیض آباد، جی-14 اور دفترِ خارجہ کے ناکوں پر تعینات کی گئی ہیں، جہاں شہری موقع پر ہی لرنر پرمٹ حاصل کر سکتے ہیں۔
سی ٹی او کا کہنا تھا کہ کہ ناکوں پر موجود پولیس اہلکار لائسنس نہ رکھنے والے افراد کے خلاف کارروائی کر رہے ہیں، تاہم انہیں موقع پر ہی لرنر پرمٹ حاصل کرنے کی سہولت دی جا رہی ہے۔
انھوں نے کہا کہ اسلام آباد ٹریفک پولیس عوام کو سہولت فراہم کرنے اور شفاف خدمات یقینی بنانے کے لیے پرعزم ہے، مہم کا مقصد شہریوں میں ذمہ دارانہ ڈرائیونگ کے رجحان کو فروغ دینا اور ٹریفک قوانین پر عمل درآمد کو یقینی بنانا ہے۔
اس سے قبل اسلام آباد ٹریفک پولیس نے فیض آباد ٹریفک آفس اور ہیڈکوارٹرز میں 15 نئی سروس ڈیسک بھی قائم کی تھیں، تاکہ شہریوں کو تیز تر اور مؤثر لائسنسنگ سہولیات فراہم کی جا سکیں۔
ترجمان کے مطابق نئی ڈیسک شام 6 بجے کے بعد بھی فعال رہیں گی، تاکہ شہری آسانی سے اپنی ضروری خدمات حاصل کر سکیں۔
سی ٹی او نے مزید کہا کہ ٹریفک پولیس جدید سہولیات کے قیام اور عوامی خدمات کو بہتر بنانے کے لیے مسلسل اقدامات کر رہی ہے۔
مزید پڑھیں۔مسلم لیگ (ق) کا 27ویں آئینی ترمیم کی حمایت کا اعلان
