اسلام آباد (اے بی این نیوز)پاکستان تحریک انصاف کے سابق رہنماؤں نے بانی پی ٹی آئی کی رہائی کے لیے ملک کی مختلف سیاسی جماعتوں اور اہم شخصیات سے رابطے شروع کرنے کا فیصلہ کر لیا ہے

ذرائع کے مطابق گزشتہ روز لاہور میں شاہ محمود قریشی سے پی ٹی آئی کے متعدد سابق رہنماؤں نے ملاقات کی جس میں سیاسی حالات پر تفصیلی گفتگو ہوئی اور موجودہ بحران کے حل کے لیے مشاورت کی گئی

بتایا گیا ہے کہ ملاقات میں فیصلہ کیا گیا کہ سیاسی درجہ حرارت کم کرنے اور بانی تحریک انصاف کی رہائی کے لیے مختلف جماعتوں سے بات چیت اور مصالحتی رابطے کیے جائیں گے تاکہ کسی سیاسی مفاہمت کی راہ ہموار ہو سکے

رابطہ مشن میں فواد چوہدری، عمران اسماعیل، علی زیدی، محمود مولوی، سبطین خان، اعجاز چوہدری اور عمر سرفراز چیمہ سمیت دیگر سابق رہنما شامل ہوں گے جو مختلف سیاسی رہنماؤں اور پارٹیوں سے بات چیت کریں گے

ذرائع کا کہنا ہے کہ سابق رہنما مسلم لیگ ن کے رہنماؤں سے ملاقات کے امکان پر بھی غور کر رہے ہیں جبکہ بانی پی ٹی آئی سے براہ راست رابطے کی کوششیں بھی کی جائیں گی

ملاقات کے دوران شاہ محمود قریشی نے پارٹی کی موجودہ صورت حال کارکنوں کے حوصلے اور آئندہ حکمت عملی پر تفصیلی بات چیت کی سابق رہنماؤں نے اس بات پر اتفاق کیا کہ سیاسی کشیدگی کے بجائے مفاہمت اور استحکام کی راہ اپنائی جائے تاکہ ملک کو موجودہ بحران سے نکالا جا سکے

مزید پڑھیں :بھارت،را کا ایجنٹ گرفتار، پاکستان مخالف پروپیگنڈا مہم کو ناکام بنا دیا گیا، عطا اللہ تارڑ