اسلام آباد(اے بی این نیوز) سپریم کورٹ کے آئینی بنچ نے پی ٹی آئی رہنما شبلی فراز کی نشست پر سینیٹ الیکشن کا شیڈول معطل کرنے کی درخواست مسترد کر دی۔ جسٹس امین الدین خان کی سربراہی میں پانچ رکنی آئینی بنچ نے درخواست کی سماعت کی۔ آئینی بنچ نے شبلی فراز کی اپیل پر پشاور ہائی کورٹ کے فیصلے کو بھی کالعدم قرار دیتے ہوئے اپیل نمٹا دی۔ عدالت نے پشاور ہائی کورٹ کو شبلی فراز کی زیر التوا درخواست پر فیصلہ کرنے کا حکم دے دیا۔
عدالت نے شبلی فراز کی خالی نشست پر سینیٹ الیکشن رکوانے کی درخواست مسترد کرتے ہوئے ریمارکس دیے کہ سینیٹ الیکشن میں مداخلت نہیں کریں گے۔ سماعت کے دوران بیرسٹر گوہر نے کہا کہ شبلی فراز کی نشست پر کل سینیٹ کا الیکشن ہے، استدعا ہے کہ الیکشن شیڈول معطل کیا جائے۔
جسٹس حسن اظہر رضوی نے ریمارکس دیئے کہ جب آپ نے سینیٹ الیکشن کے لیے امیدوار نامزد کیا ہے تو پھر حکم امتناعی کیوں مانگ رہے ہیں؟ جسٹس جمال خان مندوخیل نے ریمارکس دیئے کہ امیدوار نامزد کرنا مجبوری ہے۔ جسٹس حسن اظہر رضوی نے بیرسٹر گوہر سے مکالمہ کرتے ہوئے کہا کہ آپ خود پی ٹی آئی کے چیئرمین ہیں، آپ نے امیدوار نامزد کیا ہے تو حکم امتناعی کیوں مانگ رہے ہیں۔
کل کتنی سیٹوں پر الیکشن ہیں؟ وکیل بیرسٹر گوہر نے کہا کہ صرف ایک نشست پر الیکشن ہے، ہمیں دو آئینی عہدوں سے بے عزتی سے ہٹایا گیا ہے، آپ الیکشن رکوائیں، سینیٹ الیکشن روکیں، سپریم کورٹ کے آئینی بنچ نے پشاور ہائی کورٹ کے کیس کی سماعت غیر معینہ مدت کے لیے ملتوی کرنے کا فیصلہ کالعدم قرار دے دیا۔ بعد ازاں عدالت نے پشاور ہائی کورٹ کو فریقین کو سننے کے بعد فیصلہ کرنے کی ہدایت کی۔
مزید پڑھیں:جے یو آئی اور پی ٹی آئی کا محمود اچکزئی کو اپوزیشن لیڈر بنانے پر اتفاق
