اسلام آباد ( اے بی این نیوز )اسلام آباد الیکشن کمیشن آف پاکستان نے فیصل آباد اور ساہیوال کے حلقوں میں ضمنی انتخابات کا شیڈول جاری کر دیا ہے۔ جاری کردہ شیڈول کے مطابق ضمنی انتخابات 23 نومبر کو منعقد ہوں گے اور تمام انتظامات الیکشن کمیشن کی ہدایات کے مطابق مکمل کیے جائیں گے۔
شیڈول کے تحت امیدواروں کی جانب سے اپیلیں دائر کرنے کی آخری تاریخ 24 اکتوبر مقرر کی گئی ہے، جبکہ ان اپیلوں پر فیصلے 31 اکتوبر تک سنائے جائیں گے۔ امیدواروں کی نظرثانی شدہ فہرست یکم نومبر کو جاری کی جائے گی، جس کے بعد کاغذات نامزدگی واپس لینے کی آخری تاریخ 3 نومبر مقرر کی گئی ہے۔
الیکشن کمیشن کے مطابق انتخابی نشانات الاٹ کرنے کی تاریخ 4 نومبر طے کی گئی ہے، جبکہ پولنگ کا عمل 23 نومبر کو فیصل آباد اور ساہیوال کے مختلف حلقوں میں ہوگا۔
الیکشن کمیشن نے متعلقہ ریٹرننگ افسران کو ہدایت دی ہے کہ وہ شیڈول کے مطابق تمام مراحل کو شفاف اور منصفانہ انداز میں مکمل کریں۔ کمیشن نے مزید کہا ہے کہ انتخابات کے دوران ضابطہ اخلاق کی پابندی ہر امیدوار اور جماعت کے لیے لازمی ہوگی تاکہ عوام کے اعتماد پر مبنی انتخابی عمل یقینی بنایا جا سکے۔
مزید پڑھیں :نام نہاد ڈیورنڈلائن کے معاملے کو پاکستان نے کبھی قبول نہیں کیا،وزیردفاع خواجہ آصف
