اٹلی (اے بی این نیوز ) اٹلی کے قریب تارکین وطن کی دو کشتیاں سمندر میں ڈوب گئیں جن میں پاکستانیوں سمیت ایک سو سے زائد افراد سوار تھے۔ خبر ایجنسیوں کے مطابق ان کشتیوں میں سے ایک میں پاکستان، اریٹیریا اور سومالیہ کے پچاسی باشندے موجود تھے جو یورپ پہنچنے کی کوشش کر رہے تھے۔ حادثے کے نتیجے میں اب تک دو افراد کی ہلاکت کی تصدیق ہو چکی ہے جبکہ گیارہ افراد کو زندہ بچا لیا گیا ہے۔ لاپتہ افراد کی تلاش کے لیے ریسکیو آپریشن مسلسل جاری ہے اور امدادی ٹیمیں سمندر میں گمشدہ افراد کو تلاش کرنے کے لیے سرگرم عمل ہیں۔
اطالوی کوسٹ گارڈ اور بین الاقوامی اداروں کے مطابق یہ حادثہ ممکنہ طور پر کشتیوں کے حد سے زیادہ بوجھ اور خراب موسم کے باعث پیش آیا۔ واقعے کے بعد علاقے میں ریسکیو کارروائیاں بڑھا دی گئی ہیں جبکہ سمندری گزرگاہوں کی نگرانی مزید سخت کر دی گئی ہے۔
ذرائع کے مطابق دو ماہ قبل بھی جنوبی اٹلی کے قریب اسی نوعیت کے دو بڑے حادثے پیش آئے تھے جن میں متعدد تارکین وطن جان کی بازی ہار گئے تھے۔ اقوام متحدہ کے اعداد و شمار کے مطابق سن 2014 سے اب تک بحیرہ روم میں غیر قانونی طور پر یورپ جانے کی کوشش کرنے والے 32 ہزار سے زائد تارکین وطن سمندر میں ڈوب کر ہلاک ہو چکے ہیں۔
مزید پڑھیں :ارشد خان چائے والے کے حق میں عدالت نے بڑا فیصلہ دیدیا
