اسلام آباد (نامہ نگار) وزیرِ اعظم محمد شہباز شریف سے آزاد کشمیر میں مذاکراتی عمل کی کامیابی کے بعد حکومتی مذاکراتی کمیٹی نے اسلام آباد میں ملاقات کی۔ملاقات میں سابق وزیرِ اعظم راجہ پرویز اشرف، مشیرِ وزیرِ اعظم قمر الزماں کائرہ، مشیر برائے داخلہ رانا ثناء اللہ، وفاقی وزراء احسن اقبال، محمد اورنگزیب، سردار محمد یوسف، ڈاکٹر طارق فضل چوہدری، احد خان چیمہ اور چیئرمین یوتھ پروگرام رانا مشہود احمد خان شریک تھے۔
وزیرِ اعظم شہباز شریف نے مذاکراتی کمیٹی کے اراکین کی آزاد کشمیر میں معاملات کو احسن طریقے سے حل کرنے کے لیے کی گئی کوششوں کو سراہا۔ وزیراعظم نے کہا کہ کمیٹی نے ذمہ داری، تدبر اور سیاسی بصیرت کے ساتھ معاملات کو خوش اسلوبی سے آگے بڑھایا جس کے باعث خطے میں استحکام اور اتفاقِ رائے کی فضا قائم ہوئی۔
وزیرِ اعظم نے جوائنٹ ایکشن کمیٹی کے کردار کو بھی خراجِ تحسین پیش کرتے ہوئے کہا کہ کمیٹی نے کشمیر کی ترقی و خوشحالی کے لیے معاملہ فہمی اور مثبت سوچ کا مظاہرہ کیا، جو قابلِ تعریف ہے
انہوں نے کہا کہ آزاد کشمیر میں تمام معاملات خوش اسلوبی سے حل ہو چکے ہیں اور کشمیری عوام کے تمام جائز تحفظات کو ترجیحی بنیادوں پر دور کیا جائے گا۔
وزیرِ اعظم شہباز شریف نے اس عزم کا اعادہ کیا کہ وفاقی حکومت اپنے کشمیری بھائیوں کے مسائل کے حل کے لیے بھرپور اقدامات جاری رکھے گی۔ ان کا کہنا تھا کہ عوامی مفاد اور امن ہماری اولین ترجیح ہے اور حکومت آزاد کشمیر کے عوام کی خدمت کے لیے ہر ممکن قدم اٹھائے گی۔
وزیرِ اعظم نے کہا کہ “ہم پہلے بھی کشمیری بہن بھائیوں کے حقوق کے محافظ تھے اور آئندہ بھی ان کے حقوق کے تحفظ کے لیے ہر سطح پر اپنا کردار ادا کرتے رہیں گے۔”
انہوں نے کہا کہ آزاد کشمیر کے مسائل پر ہمیشہ خصوصی توجہ دی گئی ہے اور ان کی حکومت نے ہر موقع پر ان کے حل کو ترجیحی بنیادوں پر یقینی بنایا ہے۔
وزیرِ اعظم نے مزید کہا کہ کشمیری عوام کی امنگوں کے مطابق ان کی ترقی اور خوشحالی کے لیے عملی اقدامات کا سلسلہ جاری رکھا جائے گا تاکہ خطے میں پائیدار امن اور استحکام کو فروغ دیا جا سکے۔

مزید پڑھیں :ایتھوپیا کے سفیر کی وزیر مملکت، معاون خصوصی برائے وزیر اعظم برائے ڈیجیٹل میڈیا فہد ہارون سے الوداعی ملاقات