اسلام آباد ( اے بی این نیوز )محکمہ موسمیات نے ملک بھر میں بارشوں کے ایک نئے سلسلے کی پیش گوئی کی ہے جو دو اکتوبر سے سات اکتوبر کے دوران مختلف علاقوں کو متاثر کرے گا رپورٹ کے مطابق پنجاب اور وفاقی دارالحکومت اسلام آباد میں تین سے چھ اکتوبر تک گرج چمک کے ساتھ بارش اور بعض مقامات پر ژالہ باری کا امکان ہے خیبرپختونخوا کے مختلف اضلاع میں دو اکتوبر سے سات اکتوبر تک بارش اور تیز آندھی کی پیش گوئی کی گئی ہے آزاد کشمیر اور گلگت بلتستان میں دو اور تین اکتوبر کو بارش متوقع ہے جبکہ چار سے سات اکتوبر کے دوران بلند پہاڑی علاقوں میں برفباری ہو سکتی ہے
جو درجہ حرارت میں نمایاں کمی کا باعث بنے گی محکمہ موسمیات کے مطابق سندھ کے کئی اضلاع میں بارش کا سلسلہ آج رات سے شروع ہونے کا امکان ہے جو تین اکتوبر تک جاری رہ سکتا ہے بلوچستان میں چار سے چھ اکتوبر کے درمیان بارش اور تیز ہوائیں چلنے کی پیش گوئی کی گئی ہے مسلسل بارش کی صورت میں نشیبی علاقوں میں اربن فلڈنگ اور ندی نالوں میں طغیانی کا خطرہ ظاہر کیا گیا ہے محکمہ موسمیات نے تمام متعلقہ اداروں کو کسی بھی ہنگامی صورتحال سے نمٹنے کے لیے الرٹ رہنے کی ہدایت جاری کر دی ہے
مزید پڑھیں :آزاد کشمیر کی موجودہ صورتحال،آج اسلام آباد میں اہم اجلاس
