انقرہ (اے بی این نیوز ) انقرہ میں ترک گرینڈ نیشنل اسمبلی کے نئے مقننہ سال کے آغاز پر ترک صدر رجب طیب اردوان نے ایک بھرپور خطاب کرتے ہوئے واضح کیا کہ قبلہ اول القدس کے دفاع کے لیے ترکیہ آخری دم تک ڈٹا رہے گا۔ انہوں نے کہا کہ غزہ میں امن قائم کرنے کی سب سے بڑی ذمہ داری پہلے عالم اسلام اور پھر عالمی برادری پر عائد ہوتی ہے۔
صدر اردوان نے کہا کہ فلسطین میں جاری نسل کشی کے خلاف ترکیہ سب سے مؤثر آواز بن کر ابھرا ہے اور غزہ پر غیر متزلزل مؤقف نے عالمی سطح پر ایک روشن مثال قائم کی ہے۔ ان کے مطابق ترکیہ نے نہ صرف اسرائیل کے ساتھ تجارت معطل کر کے فلسطینی عوام سے یکجہتی کا اظہار کیا بلکہ عالمی فورمز پر بھی مسئلہ اجاگر کیا۔ انہوں نے بتایا کہ امریکی صدر ٹرمپ کے ساتھ ملاقات میں ان کا پہلا موضوع غزہ میں جاری خونریزی کا خاتمہ تھا۔
انہوں نے کہا کہ ترکیہ اُس وقت تک اپنی جدوجہد جاری رکھے گا جب تک مشرقی یروشلم کو دارالحکومت بنا کر 1967 کی سرحدوں کے مطابق ایک خودمختار فلسطینی ریاست قائم نہیں ہو جاتی۔ اردوان نے کہا کہ غزہ اب مزید خون، آنسو اور تباہی برداشت نہیں کر سکتا، یہ شرمناک صورتحال فوری طور پر ختم ہونی چاہیے۔
انہوں نے اپنی تقریر میں فلسطینی ریاست کے مشہور نعرے کا حوالہ دیتے ہوئے کہا کہ وہ دن بھی ضرور آئے گا جب “دریا سے سمندر تک” امن، سکون اور سلامتی کا بول بالا ہوگا۔ ان کے اس خطاب کو ترکیہ سمیت عالم اسلام میں بھرپور پذیرائی ملی ہے جبکہ عالمی میڈیا میں بھی یہ بیان موضوع بحث بنا ہوا ہے۔
مزید پڑھیں :پی ٹی آئی کو عوام کی امیدوں پر پورا اترنا ہوگا،تیمور سلیم جھگڑا
