کراچی(اے بی این نیوز )سندھ کے سینئر وزیر برائے اطلاعات، ٹرانسپورٹ اور ماس ٹرانزٹ، شرجیل انعام میمن نے منگل کو انکشاف کیا کہ کراچی میں خواتین کو ان کی نقل و حرکت کی ضروریات میں مدد کے لیے “پنک اسکوٹر” اس ہفتے مفت دیے جائیں گے۔
میڈیا کے نمائندوں سے خطاب کرتے ہوئے، وزیر نے بتایا کہ ڈپو کی تعمیر اور اس سے منسلک کام جاری ہے، جبکہ سینیٹر تاج حیدر پل تکمیل کے قریب ہے اور ایک ہفتے میں مکمل ہو جائے گا۔
انہوں نے بتایا کہ حکومت عالمی بنک کے تعاون سے کراچی میں ٹرانسپورٹ کے متعدد منصوبوں کو ڈیزائن کر رہی ہے۔ پنک اسکوٹر کی تقسیم کے علاوہ، جلد ہی کراچی میں ڈبل ڈیکر اور الیکٹرک بسوں کا بیڑا بھی دستیاب ہوگا۔
شرجیل انعام میمن نے مزید کہا کہ صدر آصف علی زرداری کے حالیہ دورہ چین میں سندھ میں بس مینوفیکچرنگ انڈسٹریز کی ترقی کے حوالے سے ملاقاتیں ہوئیں۔ انہوں نے کہا کہ اس طرح کے اقدامات سے ٹرانسپورٹ کی سہولیات میں اضافہ ہوگا اور روزگار کے مواقع میسر آئیں گے۔وزیر نے مزید کہا کہ یوٹیلٹیز کی منتقلی جیسے مسائل کی وجہ سے کچھ پراجیکٹس میں تاخیر ہوئی تاہم انہیں فوری طور پر حل کرنے کی کوشش کی جا رہی ہے۔
مزید پڑھیں :اقوام متحدہ نے کبھی مذاکرات میں ساتھ نہیں دیا، ٹرمپ
