راولپنڈی ( اے بی این نیوز )راولپنڈی کی اڈیالہ جیل میں بانی پی ٹی آئی اور ان کی اہلیہ بشریٰ بی بی کے خلاف توشہ خانہ ریفرنس 2 کیس کی سماعت ہوئی۔ اس موقع پر مقدمے کے آخری دو گواہان، نیب افسر محسن ہارون اور ایف آئی اے کے اسسٹنٹ ڈائریکٹر شاہد پرویز کے بیانات قلمبند کیے گئے۔ عدالت کو بتایا گیا کہ استغاثہ کے تمام گواہوں کی شہادت مکمل ہو گئی ہے اور اب مزید کوئی گواہ پیش نہیں کیا جائے گا۔
مجموعی طور پر اس کیس میں 20 گواہان کے بیانات قلمبند کیے جا چکے ہیں جن میں سے 18 پر جرح مکمل ہو چکی ہے، جبکہ آخری دو گواہوں پر وکلائے صفائی 24 ستمبر کو جرح کریں گے۔ سماعت کے دوران بانی پی ٹی آئی اور بشریٰ بی بی کو جیل سے عدالت میں پیش کیا گیا، جہاں بانی پی ٹی آئی کی تینوں بہنیں اور بشریٰ بی بی کی بیٹی مہرالنساء احمد بھی کمرہ عدالت میں موجود تھیں۔
استغاثہ کی نمائندگی ایف آئی اے کے اسپیشل پبلک پراسیکیوٹر ذوالفقار عباس نقوی اور عمیر مجید ملک نے کی۔ سماعت کی صدارت اسپیشل جج سینٹرل شاہ رخ ارجمند نے اڈیالہ جیل کے اندر کی، جہاں مقدمے کی کارروائی کو اگلے مرحلے میں داخل کر دیا گیا۔
مزید پڑھیں :پاکستان اور متحدہ عرب امارات کا لاکھوں ڈالرز مالیت کا برآمدی معاہدہ طے
