کراچی ( اے بی این نیوز ) سندھ حکومت نے 2025 میں بے نظیر ہاری کارڈ پروگرام کا تیسرا مرحلہ شروع کر دیا ہے جسے کسانوں کے لیے ایک انقلابی اقدام قرار دیا جا رہا ہے۔ یہ منصوبہ خاص طور پر چھوٹے کسانوں کو مالی طور پر مستحکم کرنے اور ان کی پیداوار بڑھانے کے لیے بنایا گیا ہے تاکہ وہ اپنی زرعی ضروریات پوری کرنے کے ساتھ ساتھ موسمی مسائل اور معاشی دباؤ کا مقابلہ کر سکیں۔
اس پروگرام کے تحت ایک سے 25 ایکڑ تک زمین رکھنے والے کسان اہل ہیں، جبکہ زیادہ توجہ 12.5 ایکڑ تک اراضی کے مالکان پر دی جا رہی ہے۔ کارڈ ہولڈرز کو فی ایکڑ ایک سے دو ہزار روپے تک براہ راست مالی امداد ملے گی۔ 12.5 سے 25 ایکڑ تک زمین رکھنے والوں کو فی ایکڑ 500 سے 1000 روپے دیے جائیں گے تاکہ بیج اور کھاد جیسی بنیادی ضروریات پوری ہو سکیں۔
سب سے اہم خصوصیت یہ ہے کہ حکومت سندھ کسانوں کو بلاسود قرضے فراہم کر رہی ہے۔ کسان صرف اصل رقم واپس کریں گے جبکہ سود صوبائی حکومت ادا کرے گی۔ ان قرضوں کو بیج، کھاد، مشینری اور شمسی توانائی سے چلنے والے ٹیوب ویل خریدنے کے لیے استعمال کیا جا سکتا ہے۔ اس کے ساتھ ساتھ فصل انشورنس اور قدرتی آفات کے دوران ہنگامی امداد بھی فراہم کی جائے گی۔
لانچ کے وقت 14 لاکھ سے زیادہ کسان رجسٹر کیے گئے ہیں اور حکومت کا ہدف ہے کہ زیادہ سے زیادہ چھوٹے کسان اس سکیم سے فائدہ اٹھا سکیں۔ اس پورے نظام کی نگرانی ڈپٹی کمشنرز اور اسسٹنٹ کمشنرز کریں گے تاکہ امداد صرف مستحقین تک پہنچے۔
بلاول بھٹو زرداری نے افتتاحی تقریب میں کہا کہ پیپلز پارٹی ہمیشہ کسانوں، مزدوروں اور غریب طبقات کی آواز رہی ہے، اور بے نظیر ہاری کارڈ اسی مشن کا تسلسل ہے۔ وزیر اعلیٰ سندھ مراد علی شاہ نے عندیہ دیا کہ آئندہ مرحلے میں زرعی قرضوں کا دائرہ مزید وسیع کیا جائے گا اور حکومت ان قرضوں کا سود ادا کر کے کسانوں پر بوجھ کم کرے گی۔ وزیر زراعت سردار محمد بخش مہر نے بتایا کہ مستقبل میں کسانوں کو جدید آلات، معیاری بیج اور شمسی توانائی کے ٹیوب ویل فراہم کرنے کا ہدف بھی شامل ہے۔
یہ اسکیم سندھ کے زرعی شعبے کو نئی سمت دینے کی صلاحیت رکھتی ہے کیونکہ اس سے کسان نہ صرف اپنی کھیتی بہتر بنا سکیں گے بلکہ انہیں غیر رسمی قرض دہندگان کے رحم و کرم پر بھی نہیں رہنا پڑے گا۔ یہ اقدام کسانوں کو معاشی طور پر مضبوط کر کے صوبے کی مجموعی زرعی معیشت کو بھی مستحکم کرے گا۔
مزید پڑھیں :علیمہ خان نے عمران خان بارے بڑی خوشخبری سنا دی،جا نئے کیا
