لاہور ( اے بی این نیوز ) وزیراعلٰی پنجاب مریم نواز شریف اور سعودی سفیر نواف بن سعید المالکی کی ملاقات ایک تاریخی موقع ثابت ہوئی، جب کنگ سلمان ایڈ اینڈ ریلیف سینٹر کی جانب سے بھیجے گئے پانچ امدادی ٹرک سیلاب متاثرین کے لیے پی ڈی ایم اے کے حوالے کیے گئے۔ اس موقع پر کنٹری ڈائریکٹر عبداللہ البقمی اور پی ڈی ایم اے کے اعلیٰ حکام بھی موجود تھے۔ امدادی سامان 10 ہزار شیلٹر کٹس اور 10 ہزار فوڈ پیکجز پر مشتمل ہے جن میں خیمے، سولر پینلز، ایل ای ڈی لائٹس، کمبل، کچن سیٹس، واٹر کولرز اور اینٹی بیکٹیریل صابن شامل ہیں، جبکہ خوراک میں آٹا، چینی، دال اور کوکنگ آئل جیسے بنیادی اجزاء رکھے گئے ہیں۔ یہ سامان قصور، جھنگ، خانیوال، حافظ آباد، چنیوٹ، ملتان اور ٹوبہ ٹیک سنگھ کے متاثرہ خاندانوں تک پہنچایا جائے گا۔
وزیراعلٰی مریم نواز نے سعودی عرب کے اس بروقت تعاون کو حقیقی بھائی چارے کی اعلیٰ مثال قرار دیا اور کہا کہ خادم الحرمین الشریفین شاہ سلمان بن عبدالعزیز اور ولی عہد محمد بن سلمان کی قیادت امت مسلمہ کے اتحاد اور ترقی کا استعارہ ہے۔ انہوں نے کہا کہ 10 ہزار فوڈ باسکٹ اور 10 ہزار شیلٹر کٹس کی فراہمی پر ہم دل کی گہرائیوں سے شکر گزار ہیں، کیونکہ یہ تعاون نہ صرف ریلیف فراہم کرے گا بلکہ پاکستان اور سعودی عرب کے درمیان اخوت اور یکجہتی کے اٹوٹ رشتے کو مزید مضبوط بنائے گا۔
ملاقات میں دونوں رہنماؤں نے باہمی تعلقات، سیلاب متاثرین کی بحالی، اقتصادی تعاون اور خطے کی صورتحال پر بھی گفتگو کی۔ مریم نواز نے کہا کہ مشکل کی اس گھڑی میں سعودی عرب کا ساتھ یہ ثابت کرتا ہے کہ پاک سعودی تعلقات صرف اسٹریٹیجک پارٹنرشپ نہیں بلکہ حقیقی اخوت اور بھائی چارے پر مبنی ہیں۔ انہوں نے اس بات پر زور دیا کہ یہ تعاون ہمیشہ یاد رکھا جائے گا اور آزمائش کی اس گھڑی میں سعودی عرب کی یہ مدد متاثرہ خاندانوں کے لیے نئی امید لے کر آئی ہے۔
مزید پڑھیں :پاکستان تحریک انصاف کے کارکنوں کاصحافیوں پر حملہ
