اسلام آباد (اے بی این نیوز) اسلام آباد میں ایک بار پھر موسم نے خوبصورت انگڑائی لی ہے۔ بادلوں کا راج قائم ہے اور موسلا دھار بارش نے نہ صرف گرمی کا زور توڑ دیا بلکہ پورے شہر کو ایک خوشگوار اور تازہ ماحول میں لپیٹ لیا۔ شہریوں نے جیسے ہی بوندوں کی پہلی رم جھم سنی، موسم سے لطف اندوز ہونے کے لیے گھروں، دفاتر اور کیفے ٹیریاز سے باہر جھانکنا شروع کر دیا۔
محکمہ موسمیات کے مطابق آج بھی اسلام آباد میں بارش جاری رہنے کا امکان ہے۔ رواں ہفتے کے آغاز سے ہی شہر کا درجہ حرارت قابلِ برداشت سطح پر آ گیا ہے، جو کہ گزشتہ ہفتے کی شدید گرمی کے مقابلے میں شہریوں کے لیے ایک راحت بھری تبدیلی ہے۔
ماہرینِ موسمیات کا کہنا ہے کہ یہ مون سون سسٹم شمالی علاقوں میں سرگرم ہے، جس کی بدولت آئندہ چند دنوں تک اسلام آباد اور گرد و نواح میں ہلکی اور تیز بارشوں کا سلسلہ جاری رہنے کی پیشگوئی کی گئی ہے۔ ان بارشوں نے نہ صرف گرمی کا زور توڑا ہے بلکہ فضائی آلودگی میں بھی کمی لائی ہے، جس سے شہریوں کو تازہ اور صاف فضا میسر آئی ہے۔
مزید پڑھیں :ٹک ٹاکر سمعیہ حجاب کیس،اہم انکشافات
