مظفرآباد (اے بی این نیوز) آزاد کشمیر میں دہشت گردی کے ممکنہ خدشات کے پیش نظر پولیس کو ریڈ الرٹ کر دیا گیا ہے، اور سیکیورٹی کے غیر معمولی انتظامات کیے گئے ہیں۔ سی پی او کی ہدایت پر تمام اضلاع میں پولیس سربراہان کو سخت حفاظتی اقدامات کے احکامات جاری کیے گئے ہیں، جن کے تحت حساس مقامات اور اہم تنصیبات کی سیکیورٹی مزید سخت کر دی گئی ہے۔
سیکیورٹی پلان کے مطابق پولیس کو گشت بڑھانے، داخلی و خارجی راستوں پر ناکہ بندیوں میں اضافہ کرنے اور مشکوک افراد و سرگرمیوں پر کڑی نظر رکھنے کی ہدایت کی گئی ہے۔ ریڈ الرٹ کے دوران کسی بھی قسم کی غفلت یا غیر ذمہ دارانہ رویے پر سخت کارروائی کا عندیہ بھی دے دیا گیا ہے۔
ریڈ الرٹ سیکیورٹی پلان کے تحت مظفرآباد میں 88 پولیس اہلکار تعینات کیے گئے ہیں، جبکہ میرپور میں 76، بھمبر میں 41، کوٹلی میں 50، پونچھ میں 62، باغ میں 55، سدھنوتی میں 31، حویلی میں 43، نیلم میں 44 اور جہلم ویلی میں 77 اہلکار ڈیوٹی پر مامور ہیں۔ مجموعی طور پر 567 اہلکار اس ریڈ الرٹ آپریشن کا حصہ ہیں۔
پولیس افسران کو واضح ہدایت دی گئی ہے کہ کسی بھی مشکوک حرکت یا اطلاع پر فوری کارروائی کی جائے، اور شہریوں کے تحفظ کو ہر صورت یقینی بنایا جائے۔ اس دوران امن و امان قائم رکھنے کے لیے جدید ٹیکنالوجی، جیسے سی سی ٹی وی کیمروں، ڈرون سرویلنس، اور ڈیجیٹل مانیٹرنگ سسٹمز کے استعمال پر بھی زور دیا جا رہا ہے۔
ضلعی پولیس حکام شہریوں سے اپیل کر رہے ہیں کہ وہ سیکیورٹی اداروں سے بھرپور تعاون کریں اور کسی بھی مشکوک فرد یا سرگرمی کی فوری اطلاع قریبی تھانے یا ہیلپ لائن پر دیں۔
مزید پڑھیں :مری میں فوڈ اتھارٹی کی کارروائی ، 700 لیٹر پانی ملا دودھ تلف
