راولپنڈی (اے بی این نیوز) راولپنڈی میں حالیہ بارشوں کے باعث نالوں میں پانی کی سطح خطرناک حد تک بلند ہو چکی ہے۔ کٹاریاں کے مقام پر پانی کی سطح 6.5 فٹ تک پہنچ گئی ہے جبکہ گوالمنڈی میں پانی 6 فٹ کی بلندی کو چھو رہا ہے، جس کے بعد ضلعی انتظامیہ اور واسا نے فوری ایکشن لیتے ہوئے علاقے میں ہنگامی اقدامات شروع کر دیے ہیں۔

گوالمنڈی کے مقام پر واسا کی بھاری مشینری تعینات کر دی گئی ہے تاکہ پانی کی نکاسی کو یقینی بنایا جا سکے۔ ریسکیو 1122 کا عملہ بھی موقع پر موجود ہے، جو کسی بھی ہنگامی صورتحال سے نمٹنے کے لیے تیار ہے۔ مقامی انتظامیہ کا کہنا ہے کہ صورت حال پر مسلسل نظر رکھی جا رہی ہے اور شہریوں کو احتیاطی تدابیر اختیار کرنے کی ہدایت کی جا رہی ہے۔

انتظامیہ کے مطابق نشیبی علاقوں میں رہنے والے شہریوں کو الرٹ جاری کیا جا چکا ہے، جبکہ ممکنہ طور پر متاثرہ علاقوں میں ایمرجنسی رسپانس تیز کر دی گئی ہے۔ شہریوں سے اپیل کی گئی ہے کہ غیر ضروری طور پر گھروں سے باہر نہ نکلیں اور انتظامیہ سے تعاون کریں۔

ریسکیو اداروں کی جانب سے مسلسل نگرانی اور بروقت کارروائی کی بدولت تاحال کسی بڑے نقصان کی اطلاع موصول نہیں ہوئی، تاہم مزید بارش کی صورت میں صورتحال مزید نازک ہو سکتی ہے۔ شہریوں کو خبردار کیا گیا ہے کہ وہ سوشل میڈیا اور مقامی نیوز چینلز پر جاری ہونے والی اپ ڈیٹس پر نظر رکھیں۔

ضلعی انتظامیہ نے یقین دہانی کروائی ہے کہ تمام ممکنہ وسائل بروئے کار لائے جا رہے ہیں تاکہ شہریوں کی جان و مال کا تحفظ یقینی بنایا جا سکے، اور اگر ضرورت پڑی تو متاثرہ علاقوں سے لوگوں کی محفوظ مقامات پر منتقلی بھی کی جائے گی۔
مزید پڑھیں :سہ فریقی سیریز: پاکستان اور افغانستان کا فائنل آج ہوگا