لاہور (اے بی این نیوز) انسداد دہشت گردی کی عدالت (اے ٹی سی) لاہور نے جناح ہاؤس حملہ کیس میں پی ٹی آئی کی بانی علیمہ خان کی بہن کے بیٹے شاہ ریز خان کی درخواست ضمانت منظور کرلی۔
عدالت نے سماعت مکمل ہونے کے بعد گزشتہ روز فیصلہ محفوظ کیا تھا جسے آج اے ٹی سی کے جج منظر علی گل نے سنایا۔
فیصلے کے مطابق شاہ ریز خان کو ضمانت پر رہا کرنے کا حکم دیا گیا ہے تاہم ان کے خلاف مقدمے کی مزید تفتیش جاری رہے گی۔
عدالت نے تمام دلائل سننے کے بعد شاہ ریز خان کی ضمانت منظور کرتے ہوئے رہا کرنے کا حکم دے دیا۔ کیس کی آئندہ سماعت پر مزید شواہد اور تحقیقاتی رپورٹ پیش کی جائے گی۔
عدالت میں سماعت کے دوران ملزم کے وکیل رانا مدثر نے موقف اختیار کیا کہ شاہ ریز پر کارکنوں کو اکسانے کی کوشش کا الزام ہے تاہم مکمل تفتیش کے باوجود ان کے خلاف کوئی براہ راست ثبوت نہیں ملے۔
وکیل نے دلائل دیتے ہوئے کہا کہ ایف آئی آر، چالان اور تفتیشی رپورٹس میں شاہ ریز کا نام شامل نہیں تھا اور وہ واقعہ کے وقت چترال میں موجود تھا جس کا بیان حلفی اور شواہد عدالت میں پیش کر دیے گئے ہیں۔
وکیل نے مزید کہا کہ ان کی والدہ علیمہ خان پی ٹی آئی کے بانی کی رہائی کے لیے آواز اٹھاتی رہی ہیں اور اسی سیاسی پس منظر کی وجہ سے ان کے بیٹے کو نشانہ بنایا گیا۔
حکومتی وکیل نے موقف اختیار کیا کہ تصاویر شاہ ریز کے دوستوں کے سوشل میڈیا اکاؤنٹس سے حاصل کی گئیں، تاہم ملزم کے اپنے اکاؤنٹس سے کچھ نہیں ملا۔
مزید پڑھیں :تیل کی قیمتوں میں کمی
