لاہور (اے بی این نیوز)لاہور میں آسمانی بجلی گرنے سے 2 افراد جاں بحق اور دو زخمی ہوگئے، بارش کے باعث خستہ حال گھر کی چھت گرنے سے بھی ایک شخص جاں بحق ہوا۔
لاہور میں آسمانی بجلی اور گھر کی چھت گرنے سے 3 افراد جاں بحق اور 2 زخمی ہوگئے۔ریسکیو حکام کے مطابق آسمانی بجلی گرنے کا واقعہ کاہنہ میں جبکہ چھت گرنے کا واقعہ انار کلی میں پیش آیا۔
ریسکیو حکام کا کہنا ہے کہ کاہنہ میں آسمانی بجلی گرنے سے 2 افراد جاں بحق اور 2 زخمی ہوئے، زخمیوں کو اسپتال میں منتقل کردیا گیا، جن کا علاج جاری ہے۔
تفصیلات کے مطابق پرانی انار کلی میں مکان کی خستہ حال چھت گرنے سے ایک شخص جاں بحق ہوگیا، مکان کی چھت کچی مٹی اور ٹی آر گارڈر سے بنی ہوئی تھی۔واضح رہے کہ لاہور میں گزشتہ 2 گھنٹوں سے مسلسل بارش کا سلسلہ جاری ہے۔
رپورٹ کے مطابق شہر میں سب سے زیادہ بارش نشتر ٹاؤن میں 145 ملی میٹر ریکارڈ ہوئی، چوک ناخدا میں 117، تاج پورہ میں 116، اپر مال 107، اقبال ٹاؤن 106 اور لکشمی چوک میں 102 ملی میٹر بارش ریکارڈ کی گئی۔
مزید پڑھیں: بلوچستان بھر میں ایک مرتبہ پھر انٹرنیٹ سروس معطل
