اسلام آباد ( اے بی این نیوز ) بھارت کی جانب سے سیلاب کی وارننگ، سیالکوٹ میں ممکنہ سیلابی صورتحال کا خدشہ۔ بھارت کی جانب سے جاری الرٹ کے بعد سیالکوٹ میں ممکنہ سیلابی صورتحال کا خدشہ پیدا ہوگیا ہے۔
سیکرٹری ایمرجنسی سروسز پنجاب ڈاکٹر رضوان نصیر نے سیالکوٹ کا ہنگامی دورہ کیا اور صورتحال کا جائزہ لیا۔ سیکرٹری ایمرجنسی سروسز کو ممکنہ سیلاب کی صورتحال اور تیاریوں سے متعلق رپورٹ پیش کر دی گئی، حکام نے بتایا کہ ممکنہ سیلاب کے پیش نظر تمام سیکٹرز کو متحرک کر دیا گیا ہے جب کہ 9 اہم مقامات پر 18 ریسکیو بوٹس، 60 ریسکیورز اور 30 سکاؤٹس الرٹ ہیں۔
ڈاکٹر رضوان کو فلڈ کنٹرول روم میں پانی کی صورتحال اور مرالہ بیراج سے متعلق رپورٹ دی گئی۔ ڈاکٹر رضوان نے مرالہ بیراج پر پانی چھوڑنے اور ریسکیو کی تیاریوں پر اطمینان کا اظہار کرتے ہوئے ہدایت کی کہ سیلاب میں لوگوں کو ہر قسم کا ریلیف فراہم کیا جائے اور قریبی علاقوں کے لوگوں کو ہنگامی صورتحال سے بروقت آگاہ کیا جائے۔
ترجمان پی ڈی ایم اے کے مطابق دریائے چناب میں سیلاب سے گجرات اور سیالکوٹ متاثر ہو سکتا ہے، دریائے چناب اور ملحقہ دریاؤں میں طغیانی کا خطرہ ہے۔ بھارتی آبی جارحیت کے باعث بہاولنگر میں دریائے ستلج میں پانی کی سطح ایک بار پھر بلند ہونے لگی ہے جس کے باعث سینکڑوں ایکڑ اراضی پر کھڑی فصلیں بہہ گئی ہیں اور زمینی کٹاؤ کے ساتھ پانی بستیوں میں داخل ہو رہا ہے۔
مزید پڑھیں :پی آئی اے کا لاہور سے پیرس تک فلائٹ آپریشن بند کرنے کا فیصلہ
