اسلام آباد (اے بی این نیوز )حکومت پی ٹی آئی مذاکرات: عمران خان نے نئی شرط عائد کر دی۔پاکستان تحریک انصاف (پی ٹی آئی) کے چیئرمین بیرسٹر گوہر نے کہا ہے کہ عمران خان چاہتے ہیں کہ حکومت سے مذاکرات کا ٹائم فریم مقرر کیا جائے۔
اڈیالہ جیل میں عمران خان سے ملاقات کے بعد میڈیا سے گفتگو کرتے ہوئے انہوں نے کہا کہ پی ٹی آئی بانی کو حکومت سے مذاکرات کے حوالے سے بریفنگ دی گئی ہے تاہم انہوں نے ہدایت کی کہ مذاکرات مقررہ مدت میں مکمل کیے جائیں۔
انہوں نے کہا کہ ہم چاہتے ہیں کہ مذاکرات جلد از جلد ختم ہوں، گزشتہ روز مذاکراتی کمیٹیوں کے درمیان ہونے والا اجلاس ابتدائی اور غیر رسمی تھا، کیونکہ اس میں ہمارے کچھ ارکان موجود نہیں تھے۔
بیرسٹر گوہر نے کہا کہ حکومتی کمیٹی کے ساتھ مذاکرات کے اگلے دور میں ہمارے مطالبات کو سامنے رکھا جائے گا۔
چیئرمین پی ٹی آئی کا کہنا تھا کہ مذاکرات کے نتیجہ خیز ہونے کے لیے پرامید ہیں، مذاکرات کے اگلے دور سے قبل پی ٹی آئی کی مذاکراتی کمیٹی عمران خان سے ملاقات کو یقینی بنانے کی کوشش کر رہے ہیں۔
مزید پڑھیں :چھٹی کا اعلان،جا نئے کس دن کی ہو گی اور وجہ کیا بنی
