اسلام آباد ( اے بی این نیوز )ملک بھر میں عوام کے لیے ایک بڑی خوشخبری سامنے آئی ہے، کیونکہ پٹرولیم مصنوعات کی قیمتوں میں نمایاں کمی کر دی گئی ہے۔ وزارت خزانہ کی جانب سے جاری نوٹیفکیشن کے مطابق ہائی اسپیڈ ڈیزل کی قیمت میں 12 روپے 84 پیسے فی لیٹر کمی کی گئی ہے، جو صارفین کے لیے خاصا ریلیف ثابت ہوگا۔ آئندہ پندرہ روز کے لیے پٹرول کی موجودہ قیمت برقرار رکھنے کا فیصلہ کیا گیا ہے، جس سے گاڑیوں کے مالکان اور ٹرانسپورٹ سیکٹر کو استحکام ملے گا۔
نوٹیفکیشن میں بتایا گیا ہے کہ مٹی کے تیل کی قیمت میں 7 روپے 19 پیسے فی لیٹر کمی کی گئی ہے جبکہ لائٹ ڈیزل آئل کی قیمت میں 8 روپے 20 پیسے کی کمی کا اعلان کیا گیا ہے۔ وزارت خزانہ کا کہنا ہے کہ نئی قیمتوں کا اطلاق آج رات 12 بجے سے ہو گا، جس کے بعد عوام کو فوری طور پر اس کمی کا فائدہ پہنچنا شروع ہو جائے گا۔
ہائی اسپیڈ ڈیزل کی نئی قیمت 272 روپے 99 پیسے مقرر۔ پٹرول کی فی لیٹر قیمت 264 روپے 61 پیسے برقرار۔ مٹی کے تیل کی فی لیٹر نئی قیمت 178 روپے 27 پیسے مقرر۔ لائیٹ ڈیزل آئل کی فی لیٹر نئی قیمت 162 روپے 37 پیسے مقرر۔
یہ فیصلہ عالمی منڈی میں تیل کی قیمتوں میں کمی اور ملکی معاشی حالات کے پیش نظر کیا گیا ہے۔ ماہرین کا کہنا ہے کہ پٹرولیم مصنوعات کی قیمتوں میں اس کمی سے مہنگائی کے دباؤ میں کمی آئے گی، ٹرانسپورٹ کے کرایوں میں کمی ممکن ہوگی اور اشیائے ضروریہ کی لاگت بھی کم ہو سکتی ہے۔ عوامی حلقوں نے اس فیصلے کو حکومت کی جانب سے ایک مثبت اور بروقت اقدام قرار دیا ہے، جو آنے والے دنوں میں معیشت پر بہتر اثر ڈال سکتا ہے۔
مزید پڑھیں :سدرشن چکرا ، اسرائیل کے آئرن ڈوم سے زیادہ طاقتور دفاعی نظام ہے،مودی کا دعویٰ
