دہلی ( اے بی این نیوز         )بھارت کا دعویٰ ہے کہ اس کے پاس اسرائیل کے آئرن ڈوم سے زیادہ طاقتور دفاعی نظام ہے۔جمعہ کو بھارتی وزیر اعظم نریندر مودی نے ‘مشن سدرشن چکرا’ کے نام سے ایک نئے دفاعی نظام کا اعلان کیا، جس کا مقصد ملکی سطح پر تیار کیا گیا ایک جدید فضائی دفاعی نظام بنانا ہے جو بھارت کے تزویراتی، شہری اور قومی طور پر اہم مقامات کو دشمن کے ممکنہ حملوں سے محفوظ رکھ سکے۔

نریندر مودی کا کہنا ہے کہ یہ منصوبہ نہ صرف حملوں کو ناکام بنائے گا بلکہ اس میں فوری جواب دینے کی صلاحیت بھی شامل ہے۔مودی کے مطابق، سدرشن چکرا میں جدید نگرانی، مداخلت اور جوابی کارروائی کی خصوصیات ہوں گی، جو ہوا، زمین اور سمندر سے خطرات کو تیزی سے ختم کرنے کے قابل ہوں گی۔

اس وقت ہندوستان روسی ساختہ S-400 فضائی دفاعی نظام استعمال کر رہا ہے، جسے موثر سمجھا جاتا ہے، لیکن نریندر مودی کا کہنا ہے کہ سدرشن چکر اس سے کہیں زیادہ وسیع تحفظ فراہم کرے گا، فوجی اڈوں، شہری آبادیوں، اہم سرکاری عمارتوں اور دیگر حساس تنصیبات کو ڈھال فراہم کرے گا۔ یہ نظام نہ صرف دشمن کے میزائلوں یا راکٹوں کو فضا میں ہی تباہ کرے گا بلکہ ہدف پر درست اور فیصلہ کن جوابی حملے بھی کرے گا۔

مودی نے کہا کہ یہ نظام 2035 تک مکمل طور پر کام کر جائے گا اور اس کی ترقی، تحقیق اور پیداوار مکمل طور پر ہندوستان میں ہو گی، جس میں نوجوانوں کو خصوصی کردار دیا جائے گا۔ انہوں نے اس کا موازنہ ہندو دیوتا کرشن کے روایتی ‘سدرشن چکر’ سے کیا۔

مزید پڑھیں :بڑی ملاقات ،امریکی صدر ڈونلڈ ٹرمپ کا طیارہ الاسکا پہنچ گیا