فیصل آباد(اے بی این نیوز)فیصل آباد میں ستیانہ روڈ پر مبینہ پولیس مقابلے کے دوران بچوں کا ریپ کرنے اور ان کی ویڈیوز بناکر بلیک میل کرنے والا ملزم ہلاک ہوگیا، ملزم کو بچوں کے ریپ اور نازیبا ویڈیوز بناکر بلیک میل کرنے کے الزام میں گرفتار کیا گیا تھا۔
نجی چینل کے مطابق کرائم کنٹرول ڈیپارٹمنٹ (سی سی ڈی) نے بتایا ہے کہ سی سی ڈی اہلکار ملزم کو برآمدگی کے لیے لے جارہے تھے کہ اس کے ساتھیوں فائرنگ کرکے اسے چھڑانے کی کوشش کی، جس کے نتیجے میں ملزم ہلاک ہوگیا جبکہ اس کے ساتھ فرار ہوگئے۔
سی سی ڈی کے مطابق ہلاک ملزم کو بچوں کے ریپ کے الزام میں گرفتار کیا گیا تھا، ملزم اسلحے کے زور پر ریپ کرنے کے بعد 20 بچوں کی نازیبا ویڈیوز بناچکا تھا اور انہیں بلیک میل کرتا تھا۔
سی سی ڈی کے مطابق ہلاک ملزم کے ساتھیوں کی گرفتاری کےلیےچھاپے مارے جارہے ہیں۔
واضح رہے کہ پنجاب میں حالیہ دنوں میں خواتین اور بچیوں سے ریپ اور انہیں ہراساں کرنے کے واقعات میں ملوث ملزمان کی پولیس مقابلوں میں ہلاکت اور زخمی ہونے کے واقعات میں اضافہ ہوا ہے۔
یاد رہے کہ 10 اگست کو لاہور کے علاقے مانگا منڈی میں لیڈی ڈاکٹر کی 13 سالہ بیٹی سے گینگ ریپ کرنے والے 2 ملزمان کو سی سی ڈی نے مبینہ مقابلے میں ہلاک کردیا تھا۔
اس سے قبل لاہور کے علاقے چوہنگ میں خاوند کے سامنے بیوی کے گینگ ریپ کا واقعہ پیش آیا تھا، واقعے میں 4 ملزمان اویس، زاہد، ارشاد اور عمران کو نامزد کیا گیا تھا، بعدازاں چاروں ملزمان 3 الگ الگ مبینہ مقابلوں میں مارے گئے تھے۔
اس سے قبل جون میں حافظ آباد میں شوہر کے سامنے بیوی کا گینگ ریپ کرنے والے 3 ملزمان بھی علیحدہ علیحدہ کارروائیوں میں اپنے ہی ساتھیوں کی مبینہ فائرنگ سے ہلاک ہوگئے تھے۔
علاوہ رواں سال اپریل میں بہاولپور میں 11 سالہ بچی کو اجتماعی ریپ کے بعد قتل کرنے والے اس کے 4 قریبی رشتے دار بھی پولیس کی کارروائی کے دوران اپنے ہی ساتھیوں کی مبینہ فائرنگ سے ہلاک ہوگئے تھے۔
گزشتہ ماہ 30 جولائی کو ملتان میں گلی میں کھیلتی بچی کے ساتھ نازیبا حرکت کرنے والا ملزم واقعے کی ویڈیو وائرل ہونے کے بعد ملزم کو پولیس کی کارروائی کے دوران اپنی فائرنگ سے زخمی ہونے کے بعد گرفتار کرلیا گیا تھا۔
قبل ازیں 28 جولائی کو قصور میں ایک بچی کے ساتھ نازیبا حرکات کی ویڈیو سوشل میڈیا پر وائرل ہونے کے بعد پولیس نے ایک ملزم کو گرفتار کر لیا تھا جو اپنی ہی فائرنگ سے زخمی ہوگیا تھا۔
مزید پڑھیں۔اسلام آباد میں مقامی سطح پر کل 13 اگست کو عام تعطیل کا اعلان
