کوئٹہ (اے بی این نیوز) وزیراعلیٰ بلوچستان سرفراز بگٹی نے کہا ہے کہ دشمن خطے میں خانہ جنگی چاہتا ہے جسے ہم مل کر ناکام بنائیں گے۔ بلوچستان کے دارالحکومت میں قومی استحکام کانفرنس سے خطاب کرتے ہوئے سرفراز بگٹی نے کہا کہ قوم اس وقت حق کی جنگ میں عظیم فتح کا جشن منا رہی ہے۔ پاکستان نے اس جنگ میں بھارت کے غرور کو کچل دیا ہے۔
انہوں نے خبردار کیا کہ بلوچستان کو ایک فضول جنگ کی طرف دھکیلا جا رہا ہے، جہاں دشمن عناصر صوبے میں خانہ جنگی کا ماحول پیدا کرنا چاہتے ہیں، لیکن ہم ایسی تمام سازشوں کو ناکام بنا دیں گے۔ بلوچستان کے عوام کو ملک سے دور کرنے کی منظم سازش کی جا رہی ہے۔ ایک سوچی سمجھی سکیم کے تحت صوبے کے نوجوانوں کو لالچ دیا جا رہا ہے تاکہ بلوچستان کو کمزور کیا جا سکے۔
وزیراعلیٰ نے کہا کہ دہشت گردی کا مذہب سے کوئی تعلق نہیں اور ریاست کے خلاف ہتھیار اٹھانے والوں سے مذاکرات کی کوئی گنجائش نہیں ہونی چاہیے۔ تاہم وہ امن کے لیے ہر سطح پر بات چیت کے حامی ہیں۔ انہوں نے اعتراف کیا کہ غیر متوازن ترقی ایک سنگین مسئلہ ہے لیکن یہ صرف بلوچستان تک محدود نہیں بلکہ ملک کے دیگر حصے بھی اس سے متاثر ہیں۔
سرفراز بگٹی نے کہا کہ دو فیصد گمراہ لوگ پورے بلوچستان کی نمائندگی نہیں کرتے۔ انہوں نے کہا کہ قیام پاکستان کے وقت قبائلی عمائدین نے پاکستان میں شامل ہونے کا فیصلہ کیا تھا اور آج بھی ہماری پہچان صرف پاکستان ہے۔ 14 اگست 1947 کے بعد ہماری پہچان پاکستان ہے اور میری پہلی پہچان پاکستانیت ہے اس کے بعد بلوچ۔
انہوں نے مزید کہا کہ بلوچستان میں اقلیتوں کے درمیان مذہبی ہم آہنگی اور اتحاد دیگر صوبوں کے لیے ایک مثال ہے۔ امن و امان کے قیام میں علماء کرام کا کردار قابل تحسین ہے۔ پاکستان توڑنے کی باتیں کرنے والوں نے انصاف کی جنگ میں اپنا انجام دیکھ لیا ہے۔ سماجی اصلاح کے لیے سوشل میڈیا کے مثبت استعمال پر زور دیتے ہوئے انہوں نے کہا کہ بلوچ روایات کے مطابق کبھی کسی مسافر کو نقصان نہیں پہنچا، دہشت گردی میں صرف انتہا پسند ملوث ہیں۔
