لاہور(اے بی این نیوز)حکومت پنجاب نے صوبے بھر میں ماہانہ صفائی فیس عائد کرنے کا فیصلہ کرلیا، رہائشی علاقوں میں فیس 200، جب کہ کمرشل علاقوں میں زیادہ سے زیادہ 5 ہزار روپے تک ہوگی۔

ذرائع کے مطابق ترجمان محکمہ بلدیات پنجاب نے کہا ہے کہ شہری اور دیہی علاقوں میں مختلف فیس ہوگی، رہائشی علاقوں میں فیس کم جب کہ کمرشل علاقوں میں فیس زیادہ ہوگی۔

محکمہ بلدیات پنجاب کے ترجمان نے بتایا کہ بلنگ کا سلسلہ ڈیجٹائز ہوگا مگر ابتدائی طور پر 2 ماہ کا بل پرنٹ کرکے دیا جائے گا۔ترجمان نے بتایا کہ شہری آن لائن ایپلی کیشن کے ذریعے فیس ادا کر سکیں گے۔

انہوں نے کہا کہ آن لائن ایپ استعمال نہ کرنے والوں سے کمپنی کے سپروائزر فیس وصول کریں گے، ستھرا پنجاب مہم 8 ماہ سے چل رہی ہے، جس کے تحت کوئی فیس نہیں لی گئی۔

ترجمان نے کہا کہ اب حکومت پنجاب نے صفائی فیس وصول کرنے کا فیصلہ کیا ہے، پہلے سال ہمارا ٹارگٹ 15 ارب وصول کرنے کا ہے۔
مزید پڑھیں: انسانی اعضا کی غیر قانونی پیوندکاری کے سینٹر کا انکشاف