راولپنڈی ( اے بی این نیوز   )راولپنڈی کی انسدادِ دہشت گردی عدالت نے پاکستان تحریکِ انصاف کے پینسٹھ رہنماؤں اور کارکنوں کے ناقابلِ ضمانت وارنٹ گرفتاری جاری کر دیے ہیں۔ یہ کارروائی 26 نومبر کے احتجاجی مظاہروں سے متعلق مختلف مقدمات میں کی گئی ہے، جن میں کئی اہم رہنما نامزد ہیں۔ عدالت کی جانب سے جاری کیے گئے وارنٹ میں سابق صدر ڈاکٹر عارف علوی، خیبرپختونخوا کے وزیراعلیٰ علی امین گنڈاپور، اپوزیشن لیڈر عمر ایوب، اور علیمہ خانم سمیت دیگر رہنماؤں کے نام شامل ہیں۔

ملزمان میں زبیر نیازی، حماد اظہر، مطیع اللہ شاہ، فرخ محمد سیال، کنول شوزب، شیخ وقاص اکرم، عامر مغل اور میاں اسلم اقبال کے نام بھی شامل کیے گئے ہیں۔ تین مختلف مقدمات میں مجموعی طور پر 28 ملزمان صادق آباد کیس، 18 واہ کینٹ کیس اور 19 نصیر آباد کیس میں نامزد ہیں۔

راولپنڈی پولیس کے ترجمان کے مطابق ملزمان کی گرفتاری کے لیے خصوصی ٹیمیں تشکیل دی گئی ہیں اور مختلف علاقوں میں چھاپے مارے جا رہے ہیں۔ ترجمان کا کہنا ہے کہ تمام ملزمان کو گرفتار کرکے عدالت میں پیش کیا جائے گا تاکہ قانونی کارروائی کو آگے بڑھایا جا سکے۔
مزید پڑھیں :ایران کے صدر آئندہ اتوار کو پاکستان کے دورے پر آئیں گے،ایرانی سفیر