لاہور (اے بی این نیوز) معروف فیشن ڈیزائنر ماریہ بی نے حال ہی میں اداکارہ سارہ خان کی حمایت کرتے ہوئے سابق صحافی اور مصنفہ ریحام خان پر کڑی تنقید کی ہے۔ انسٹاگرام پر جاری ایک ویڈیو بیان میں ماریہ بی نے کہا کہ پاکستان میں چند لوگ مغربی حقوق نسواں کے نظریات کو فروغ دینا چاہتے ہیں، جیسے کہ خواتین مارچ میں دیکھنے کو ملا۔ ان کے مطابق، اسلام میں یہ تصور ہے کہ میرا جسم میری مرضی نہیں بلکہ میرا جسم اللہ کی امانت ہے۔
یہ تنازعہ اُس وقت شروع ہوا جب مئی میں سارہ خان نے ایک انٹرویو میں خود کو فیمینسٹ کہنے سے انکار کرتے ہوئے کہا تھا کہ وہ ایک روایتی خاتون ہیں، گھر میں رہنا پسند کرتی ہیں، لائن میں کھڑے ہو کر بل ادا نہیں کرنا چاہتیں اور چاہتی ہیں کہ ان کا شوہر یہ سب کرے۔ سارہ خان کے مطابق، معاشرے میں مردوں کو وہ مقام ملنا چاہیے جو ان کے لیے مخصوص ہے تاکہ خواتین سکون سے رہ سکیں۔
اس بیان پر ردعمل دیتے ہوئے ریحام خان نے کہا تھا کہ سارہ خان آج جو کچھ بھی ہیں، وہ حقوق نسواں کی تحریکوں کے باعث ہیں۔ ریحام نے دعویٰ کیا کہ اگر خواتین کے حقوق کی جدوجہد نہ ہوتی تو سارہ خان کو ڈراموں میں کام کرنے اور اپنی رائے دینے کا موقع نہ ملتا۔
ماریہ بی نے اس مؤقف کو شدید تنقید کا نشانہ بناتے ہوئے کہا کہ عورت کی اصل طاقت اس کے خاندانی احترام اور ذمہ داری نبھانے میں ہے، نہ کہ مغربی طرز کے نعروں میں۔ انہوں نے مزید کہا کہ *”ایک عورت تب ہی بااختیار ہوتی ہے جب وہ والدین کی خدمت، شوہر اور بھائیوں کا احترام کرے اور حتیٰ کہ اپنے سابق شوہر کی عزت بھی برقرار رکھے۔
یہ تنازعہ پاکستان میں خواتین کے حقوق، فیمینزم اور روایتی اقدار کے درمیان جاری بحث کو ایک نیا موڑ دے رہا ہے اور آنے والے دنوں میں اس پر مزید ردعمل سامنے آنے کا امکان ہے۔
مزید پڑھیں :امیتابھ اگلے جہان سدھار گئے،بعد مرنے کے دوبارہ زندہ ہو کر کیا بتا یا،حیران کن باتیں ،جا نئے
