قلات (اے بی این نیوز) بلوچستان کے ضلع قلات میں دہشت گردی کی ایک اور دلخراش واردات میں انسانی جانوں کا ضیاع ہو گیا۔ قلات کے علاقے نیمرغ کے قریب کراچی سے کوئٹہ جانے والی مسافر کوچ پر نامعلوم افراد کی جانب سے فائرنگ کی گئی، جس کے نتیجے میں کم از کم تین مسافر جان کی بازی ہار گئے جبکہ سات دیگر زخمی ہو گئے۔
پولیس اور سیکیورٹی ذرائع کے مطابق کوچ میں موجود متعدد افراد فائرنگ کی زد میں آ گئے، زخمیوں کو فوری طور پر قریبی سول ہسپتال منتقل کیا جا رہا ہے جہاں ان کا علاج جاری ہے۔ واقعے کے بعد سیکیورٹی فورسز نے علاقے کو گھیرے میں لے لیا ہے اور سرچ آپریشن شروع کر دیا گیا ہے۔
بلوچستان حکومت کے ترجمان کا کہنا ہے کہ یہ حملہ ایک بزدلانہ دہشت گردی کی کارروائی ہے جس کا مقصد امن و امان کو خراب کرنا ہے۔ ترجمان نے واقعے کی شدید مذمت کرتے ہوئے کہا کہ معصوم شہریوں کو نشانہ بنانا ناقابلِ معافی جرم ہے اور اس کے ذمہ داروں کو قانون کے کٹہرے میں لایا جائے گا۔
وزیراعلیٰ بلوچستان نے بھی واقعے کا نوٹس لیتے ہوئے فوری تحقیقات کا حکم دیا ہے۔ انہوں نے کہا کہ قلات جیسے پُرامن علاقے میں اس قسم کی کارروائیاں صوبے کے خلاف سازش ہیں، جن کا مقابلہ عوام اور ریاستی ادارے مل کر کریں گے۔
سوشل میڈیا پر واقعے کی خبر وائرل ہوتے ہی عوام میں شدید غم و غصہ پایا جا رہا ہے۔ شہریوں کا کہنا ہے کہ مسافر گاڑیوں کو تحفظ فراہم کرنا حکومت کی بنیادی ذمہ داری ہے، اور اس قسم کے واقعات کے تدارک کے لیے فوری اور مؤثر اقدامات کی ضرورت ہے۔
قلات کا واقعہ بلوچستان میں ایک بار پھر سیکیورٹی صورتحال کے حوالے سے سوالات کھڑا کر رہا ہے، جہاں پہلے ہی دہشت گردی کے مختلف واقعات سے لوگ عدم تحفظ کا شکار ہیں۔ عوامی حلقوں کی جانب سے مطالبہ کیا جا رہا ہے کہ دہشت گرد عناصر کے خلاف سخت اور نتیجہ خیز کارروائی کی جائے تاکہ بے گناہ انسانی جانوں کا تحفظ ممکن ہو سکے۔
مزید پڑھیں :نیب کا بحریہ ٹاون کراچی میں ایک اور چھاپہ،متعدد گاڑیاں تحویل میں لے لیں
