لاہور(اے بی این نیوز)عدالت نے سابق وزیراعلیٰ پنجاب چوہدری پرویز الٰہی کی رٹ پٹیشن پر نیب کو نوٹس جاری کرتے ہوئے احتساب عدالت کا فیصلہ معطل کیا اور انہیں نیب کورٹ میں حاضری سے استثنیٰ دیدیا،چوہدری پرویز الٰہی کی طرف سے سردار عبدالرازق خان ایڈووکیٹ اور عامر سعید راں ہائیکورٹ ڈویژن بینچ میں پیش ہوئے، جو جسٹس شہرام سرور اور ساجد محمود سیٹھی پر مشتمل تھا۔

دوران سماعت وکیل نے بتایا کہ چوہدری پرویز الٰہی بزرگ سیاستدان ہیں اور خرابی صحت کی بنا پر لاہور میں زیرعلاج ہیں وہ ہر تاریخ پر احتساب عدالت نہیں آسکتے، ٹرائل کورٹ نے ذاتی حاضری سے استثنیٰ کی درخواست غیر قانونی طور پر خارج کی ہے،جسٹس شہرام سرور نے نیب پراسیکیوٹر کو طلب کرکے پوچھا کہ نیب کو پرویز الٰہی کی ذاتی حاضری سے استثنیٰ پر کیا اعتراض ہے، جس پر بتایا گیا کہ پرویز الٰہی کی علالت ایسی نہیں ہے کہ انہیں استثنیٰ دیا جائے۔

بعد ازاں عدالت نے ابتدائی سماعت کے بعد پرویزالٰہی کی رٹ پٹشن باقاعدہ سماعت کیلئے منظور کرتے ہوئے احتساب عدالت کافیصلہ معطل کردیا اور نیب کو تفصیلی بحث کیلئے نوٹس جاری کردیا۔
مزید پڑھیں: فیڈرل بورڈ نے میٹرک کے نتائج 2025 کا اعلان کر دیا ، چیک کرنے کا طریقہ کار جانیں