راولپنڈی (اے بی این نیوز) چیئرمین تحریک انصاف عمران خان کی بہنوں عظمیٰ خان اور نورین خان کو آج اڈیالہ جیل میں ان سے ملاقات کی اجازت دے دی گئی۔ دونوں بہنیں داہگل ناکے سے جیل کی جانب روانہ ہوئیں جہاں اُن کی ملاقات کے انتظامات مکمل کیے گئے تھے۔
ذرائع کے مطابق، یہ ملاقات قانونی کارروائی کے بعد عمل میں لائی گئی، جس کے تحت اہلِ خانہ کو قیدیوں سے ملنے کی اجازت دی جاتی ہے۔ اس موقع پر سکیورٹی کے سخت انتظامات کیے گئے تھے تاکہ کسی بھی ناخوشگوار واقعے سے بچا جا سکے۔ملاقات کے موقع پر میڈیا سے مختصر گفتگو کرتے ہوئے نورین خان نے کہا،پولیس والے بہت اچھے ہیں، اللہ ان کو اچھے حکمران دے۔
ان کے اس بیان کو سوشل میڈیا پر خاصی پذیرائی حاصل ہوئی، جہاں صارفین نے ان کے مثبت رویے کو سراہا۔واضح رہے کہ عمران خان مختلف مقدمات میں زیرِ حراست ہیں اور اڈیالہ جیل میں قید ہیں۔ ان کے اہلِ خانہ کی جانب سے متعدد بار ملاقات کی درخواستیں دی گئی تھیں، جن میں سے اب یہ ملاقات منظور کر لی گئی ہے۔یہ پیش رفت اس وقت ہوئی ہے جب ملک میں سیاسی درجہ حرارت ایک بار پھر بلند ہو چکا ہے اور تحریک انصاف کی قیادت اور کارکنان عمران خان کی رہائی کے لیے سرگرم ہیں۔
مزید پڑھیں :اسلام آباد اور گردونواح میں گردوغبار کا طوفان، راولپنڈی کے مختلف علاقوں میں تیز بارش اور ژالہ باری
