اسلام آباد ( اے بی این نیوز )پاکستان تحریک انصاف کے سینئر رہنما اور سابق وزیر خارجہ شاہ محمود قریشی کو پنجاب انسٹی ٹیوٹ آف کارڈیالوجی (پی آئی سی) سے علاج مکمل ہونے کے بعد ڈسچارج کر کے دوبارہ کوٹ لکھپت جیل منتقل کر دیا گیا ہے۔
انہیں 17 مئی کو سینے میں تکلیف کی شکایت پر جیل سے اسپتال منتقل کیا گیا تھا، جہاں وہ آٹھ روز تک زیر علاج رہے۔ ہفتے کے روز طبی عملے نے ان کی حالت کو مستحکم قرار دیتے ہوئے انہیں فارغ کر دیا، جس کے بعد پولیس نے سخت سیکیورٹی میں ان کی جیل واپسی یقینی بنائی۔
واپسی پر جیل میں صحافیوں سے غیر رسمی گفتگو کے دوران شاہ محمود قریشی نے بتایا کہ ڈاکٹروں کے مطابق ان کی حالت ابھی سفر کے قابل نہیں، اور ان کا سی ٹی اسکین اور اینجیوگرافی بھی تاحال باقی ہے۔
انہوں نے مزید انکشاف کیا کہ اسپتال انتظامیہ سے انہوں نے اپنی میڈیکل فائل دکھانے کا مطالبہ کیا، تاہم انہیں فائل تک رسائی دینے سے انکار کر دیا گیا۔
