اسلام آباد ( اے بی این نیوز )پاکستان تحریک انصاف کے چیئرمین بیرسٹر گوہر نے اڈیالہ جیل میں عمران خان سے ملاقات کے بعد میڈیا سے گفتگو کرتے ہوئے بتایا کہ عمران خان نے اسٹیبلشمنٹ کے ساتھ مذاکرات کے لیے دروازہ کبھی بند نہیں کیا۔
بیرسٹر گوہر کا کہنا تھا کہ عمران خان نے کہا ہے کہ یہ اتحاد کا وقت ہے، پارٹی اور افواج پاکستان کے درمیان ہم آہنگی ہونی چاہیے۔ ان کا کہنا تھا کہ عمران خان کا مؤقف ہے کہ ملک کو اس وقت اتحاد اور استحکام کی ضرورت ہے، اور افواج پاکستان کی بھارت کو مؤثر جواب دینے کی صلاحیت نے پوری قوم کا مورال بلند کیا ہے۔
انہوں نے مزید وضاحت کی کہ عمران خان نے حکومت سے بات چیت سے انکار کیا تھا، مگر اسٹیبلشمنٹ سے مذاکرات کے امکان کو کبھی مسترد نہیں کیا۔
اس موقع پر پی ٹی آئی کے جنرل سیکرٹری سلمان اکرم راجا نے بھی ملاقات کو مثبت قرار دیتے ہوئے کہا کہ عمران خان کی صحت بالکل ٹھیک ہے اور وہ پرعزم ہیں۔ انہوں نے کہا کہ عمران خان نے زور دیا ہے کہ پاکستان کو اندرونی اتحاد کی ضرورت ہے اور تحریک انصاف قومی یکجہتی کے لیے اپنا کردار ادا کرنے کو تیار ہے۔
یہ بیانات ایک ایسے وقت میں سامنے آئے ہیں جب سیاسی منظرنامہ کشیدگی کا شکار ہے، اور ان میں ممکنہ مفاہمت کے اشارے کو اہم پیش رفت کے طور پر دیکھا جا رہا ہے۔
