کراچی ( اے بی این نیوز ) عوامی تحریک کی مرکزی نائب صدر حورالنساء پلیجو 81 برس کی عمر میں انتقال کر گئیں۔ وہ سندھیانی تحریک کی بانی اراکین میں شمار کی جاتی تھیں اور انہوں نے آمریت کے خلاف جرات مندانہ جدوجہد کی۔
عوامی تحریک کے ترجمان کے مطابق حورالنساء پلیجو سانس کی تکلیف کے باعث کراچی میں وفات پا گئیں۔ ان کی نماز جنازہ آج شام 4:30 بجے منگر خان پلیجو، جنگ شاہی میں ادا کی جائے گی۔ جماعت کی جانب سے تین روزہ سوگ کا اعلان کیا گیا ہے۔حورالنساء پلیجو نے جنرل ضیاء الحق اور جنرل پرویز مشرف کے ادوار میں آمریت کے خلاف بھرپور مزاحمت کی۔ وہ کینال سسٹم اور کارپوریٹ فارمنگ جیسے عوامی مسائل کے خلاف آواز بلند کرتی رہیں۔
انہوں نے بین الاقوامی سطح پر بھی سندھ کی خواتین کی نمائندگی کی، جن میں انڈیا، فلپائن سمیت دیگر ممالک شامل ہیں۔ ان کی سیاسی جدوجہد رسول بخش پلیجو کے انقلابی نظریے سے متاثر تھی۔عوامی تحریک اور سندھیانی تحریک کی قیادت نے ان کے انتقال پر گہرے رنج و غم کا اظہار کرتے ہوئے کہا ہے کہ ان کی خدمات ہمیشہ یاد رکھی جائیں گی۔
