سیالکوٹ (اے بی این نیوز)سیالکوٹ ایئرپورٹ سے درجنوں افغان شہریوں کو جعلی کاغذات پر بیرون ملک فرار کرانیکا سنسنی خیز انکشاف ہوا ہے۔ ایف آئی اے گوجرانوالہ نے کارروائی کرتے ہوئے اپنے ہی 10اہلکاروں کیخلاف مقدمہ درج کر لیا ہے جبکہ چھ ٹریول ایجنٹس کو بھی اسی مقدمے میں نامزد کیا گیا ہے۔

ایف آئی اے ترجمان کے مطابق ملزمان سیالکوٹ ایئرپورٹ پر تعینات تھے اور مبینہ طور پر چالیس سے زائد افغان باشندوں کو جعلی دستاویزات پر بیرون ملک بھجوانے میں ملوث پائے گئے۔تحقیقات کے دوران یہ بات سامنے آئی کہ افغان شہریوں کے جعلی شناختی دستاویزات کی نادرا اور پاسپورٹ آفس سے تصدیق کرائی گئی تھی، جنہوں نے واضح طور پر بتایا کہ ان افراد کا کوئی ریکارڈ موجود نہیں۔

یہ اسکینڈل اس وقت سامنے آیا جب ایک افغان شہری کے فرار کی شکایت پر انکوائری کا آغاز کیا گیا، جس کے بعد تحقیقات کا دائرہ وسیع ہوا اور مفرور افغان باشندوں کی تعداد چالیس سے زائد ہو گئی۔

ایف آئی اے نے انکشاف کیا ہے کہ ان مسافروں کے جعلی پروٹیکٹر لاہور، کراچی اور مالاکنڈ کے دفاتر سے جاری کئے گئے، جنہیں بعد ازاں تصدیق کے لیے متعلقہ دفاتر کو بھیجا گیا۔ تمام پروٹیکٹر آفسز نے تصدیق کی کہ یہ دستاویزات جعلی ہیں۔مزید تحقیقات جاری ہیں جبکہ ایف آئی اے نے تمام ملوث اہلکاروں اور ایجنٹس کے خلاف سخت قانونی کارروائی کا عندیہ دیا ہے۔
مزید پڑھیں: معرکہ حق،یوم تشکر،وزیراعظم پاکستان کی آرمی چیف کے ہمراہ اسکاڈرن لیڈر عثمان یوسف شہید کے گھر آمد