راولپنڈی (اے بی این نیوز )وزیر اعلی پنجاب مریم نواز شریف کا لاہور سے راولپنڈی تک پاکستان کی پہلی تیز ترین ‘بلٹ ٹرین’ چلانے کا فیصلہ ۔ لاہور اور راولپنڈی کے درمیان چلنے والی بلٹ ٹرین سوا دو سے اڑھائی گھنٹے میں فاصلہ طے کرے گی ۔ وزیر اعلی پنجاب کی ہدایت پر سینیئر صوبائی وزیر مریم اورنگزیب کا منصوبے کے حوالے سے پہلا اجلاس۔
وزیر اعلی پنجاب کی ہدایت پر سینیئر صوبائی وزیر مریم اورنگزیب اور وفاقی وزیر ریلوے حنیف عباسی، کی صدارت میں پہلا اجلاس ہوا۔ مریم اورنگزیب نے منصوبے کی فیزیبلٹی، ٹائم لائن کی تیاری کے لئے صوبائی وزیر ٹرانسپورٹ پنجاب بلال اکبر خان ، مشیر وزیرعلیٰ پنجاب شاہد تارڑ، چیئرمین ریلوے سی ای او ریلوے پہ مشتمل ورکنگ گروپ بنا دیا۔
مریم اورنگزیب ورکنگ گروپ کی تجاویز آئیندہ ہفتے وزیراعلی کو پیش کریں گی۔ پنجاب کے صوبائی وزیر ٹرانسپورٹ پنجاب بلال اکبر خان بذریعہ ویڈیو لنک،سیکرٹری ٹرانسپورٹ عمران سکندربلوچ اورسیکرٹری پلاننگ اینڈ ڈویلپمنٹ اصف طفیل اجلاس میں شریک ہوۓ ۔
شہروں کے درمیان ٹرین کے ذریعے شہریوں کو جدید سفری سہولیات کی فراہمی کی وزیرِ اعلیٰ پنجاب کی ہدایت پر عملدرآمد کے حوالے سے یہ پہلا اجلاس تھا ۔ نئے ریل روٹس کی نشاندہی کی جائے گی، ریلوے حکام کی ریل نیٹ ورک اور پٹڑی سے متعلق اجلاس کو تفصیلی بریفنگ بھی دی گئی۔ مریم اورنگزیب نے کہا کہ
بلٹ ٹرین کا آغاز کرکے نواز شریف اور مریم نواز شریف عوام سے اپنے ایک اور وعدے کو پورا کریں گے۔ وزیر اعلیٰ مریم نواز شریف عوام کو سفر کی سستی، تیز ترین اور آرام دہ سہولیات چاہتی ہیں۔
وزیر اعلی پنجاب کا وژن ہے ٹرین عوامی سواری ہے، اسے جدید معیار پر لانا ہے۔
وزیراعلٰی پنجاب مریم نواز کی ہدایت پہ لاہور اور راولپنڈی کے ریلوے سٹیشن کی اپ گریڈیشن بھی پلان میں شامل ہے۔ وزیر اعلی پنجاب کی ہدایت کے مطابق محکمہ سیاحت پنجاب کے تعاون سے راولپنڈی تا لاہوت ٹریک کو خوبصورت بنانے کی تجویز پر کام کریں گے۔
