ہری پور ( اے بی این نیوز )قومی اسمبلی میں اپوزیشن لیڈر عمر ایوب نے ہری پور میں پی ٹی آئی ورکرز کنونشن سے خطاب کرتے ہو ئے کہا ہے کہ عمران خان کی رہائی کی ہر کال پر لبیک کہا جائے گا۔
عمران خان کی رہائی کے لیے ہر پکار کا جواب دیں گے۔ عمران خان سمیت تمام سیاسی قیدیوں کو رہا کیا جائے۔
عمر ایوب نے کہا کہ پی ٹی آئی جمہوری جماعت ہے، جماعتوں میں اختلافات ہوتے ہیں، لیکن پی ٹی آئی میں عمران خان کی ہر بات حتمی ہوتی ہے، اور ہر کوئی اس کا جواب دیتا ہے۔اپوزیشن لیڈر نے کہا کہ آصف زرداری اور پیپلز پارٹی نے سندھ کا پانی بیچ دیا ہے، جب کہ بلوچستان کے حالات بھی خراب ہیں، اختر مینگل انصاف مانگ رہے ہیں۔
انہوں نے کہا کہ پی ٹی آئی کے خلاف ہر حربہ آزمایا گیا، ہم پر لاٹھی چارج کیا گیا، گولیاں چلائی گئیں لیکن ہم نے جمہوری طریقے اپنائے۔ورکرز کنونشن میں صوبائی صدر پی ٹی آئی جنید اکبر، صوبائی جنرل سیکرٹری علی اصغر خان، صوبائی وزراء اور اراکین اسمبلی نے شرکت کی۔
کنونشن سے خطاب کرتے ہوئے پی ٹی آئی خیبر پختونخوا کے صدر جنید اکبر نے کہا کہ جس دن کارکن قیادت کے بغیر باہر نکلیں گے اس دن سنبھالنا مشکل ہو جائے گا۔انہوں نے کہا کہ عوام عمران خان کے ساتھ ہیں، ان کی کال پر سڑکوں پر ہوں گے، اس وقت پارلیمنٹ سے عوام کا اعتماد اٹھ چکا ہے۔جنید اکبر نے کہا کہ میں 16 بار عمران خان سے ملنے گیا لیکن ان سے ملنے نہیں دیا گیا، پارٹی قیادت کے خلاف مقدمات بنائے جا رہے ہیں لیکن ہم اپنے موقف سے پیچھے نہیں ہٹیں گے۔
مزید پڑھیں :چلی،2 گھنٹوں میں 160 زلزلوں کے بعد آتش فشاں پھٹنے کی وارننگ جاری
