پشاور ( اے بی این نیوز )خیبرپختونخوا کے وزیر اعلیٰ اور پی ٹی آئی کے رہنماؤں کے درمیان اختلافات کھل کر سامنے آ گئے ہیں۔ پی ٹی آئی کے صوبائی صدر جنید اکبر نے پشاور میں میڈیا سے گفتگو کرتے ہوئے کہا کہ پارٹی میں کچھ افراد کی کوئی حیثیت نہیں ہے۔ انہوں نے واضح کیا کہ وزیر اعلیٰ کو ہٹانے کا کوئی ارادہ نہیں ہے، تاہم علی امین گنڈا پور کے الزامات پر پارٹی کی سیاسی کمیٹی نے نوٹس لے لیا ہے کیونکہ وہ الزامات درست نہیں ہیں۔
جنید اکبر نے مزید کہا کہ علی امین گنڈا پور اور تیمور جھگڑا دونوں بانی پی ٹی آئی کے کارکن ہیں اور پارٹی کی سینئر قیادت نے وزیر اعلیٰ کے بیانات کا بھی نوٹس لے لیا ہے۔ انہوں نے اس صورتحال میں صبر و تحمل کی ضرورت پر زور دیا اور کہا کہ علی امین گنڈا پور کو وزیر اعلیٰ کے منصب کے لئے بانی چیئرمین عمران خان نے منتخب کیا تھا۔ ان کا کہنا تھا کہ اس وقت پارٹی عمران خان کو جیل سے نکالنے کی جدوجہد کر رہی ہے۔
