اسلام آباد ( اے بی این نیوز )یورپی ملک سویڈن نے 9 اپریل 2025ء سے پاکستانی شہریوں کے لیے ویزا پراسیسنگ دوبارہ شروع کرنے کا اعلان کیا ہے۔
اسلام آباد میں سویڈش سفارتخانے نے تصدیق کی ہے کہ اب پاکستانی شہری کام، تعلیم یا خاندان کے ساتھ دوبارہ ملنے کے لیے سویڈن میں رہائشی اجازت نامے کی درخواستیں مقامی طور پر جمع کروا سکیں گے۔ اس سے پہلے پاکستانیوں کو ویزا کے عمل کے لیے ایتھوپیا جانا پڑتا تھا۔
سویڈن کے سفارتخانے کے مطابق اس جزوی بحالی کا مقصد طلباء، ہنر مند کارکنوں اور خاندانوں کے لیے سہولت فراہم کرنا ہے، اور 2023 میں معطلی کی وجہ سے پیدا ہونے والے بیک لاگ کو دور کرنا ہے۔
سویڈش سفارتخانے نے یہ بھی بتایا کہ بایو میٹرک ڈیٹا اکٹھا کرنے، پاسپورٹ کی تصدیق اور انٹرویوز اسلام آباد میں ہوں گے۔ قلیل مدتی شینگن ویزا درخواستوں پر کارروائی وی ایف ایس گلوبل دفاتر کے ذریعے جاری رہے گی۔
یہ فیصلہ پاکستانی درخواست دہندگان کے لیے ویزا پراسیسنگ کے عمل کو سادہ بنانے کے لیے کیا گیا ہے۔
