سعودی حکومت نے پاکستانی حجاج کرام کے لیے اہم فیصلہ کیا ہے جس کے تحت حج 2025 کے سلسلے میں تیاریاں جاری ہیں۔ وزارت مذہبی امور نے حیدرآباد میں عارضی حاجی کیمپ قائم کرنے کا فیصلہ کیا ہے تاکہ عازمین حج کی بہتر تربیت اور رہنمائی فراہم کی جا سکے۔
ڈپٹی ڈائریکٹر حج کراچی گلزار سومرو کے مطابق، عازمین حج کی ایمیگریشن اسلام آباد اور کراچی ایئرپورٹ پر کی جائے گی۔ سندھ کے چھ اضلاع اور کراچی کے حاجی کیمپ میں حج آگاہی اور تربیتی پروگرامز منعقد ہوں گے۔ 8 سے 13 اپریل تک 3446 عازمین حج کو تربیت فراہم کی جائے گی، جبکہ حاجی کیمپ کراچی میں 13 سے 21 اپریل تک تربیت کا عمل جاری رہے گا۔ اس کے علاوہ، فقہ جعفریہ کے تقریباً 500 عازمین حج کے لیے 22 اپریل کو ایک خصوصی تربیتی سیشن بھی ہوگا۔
وزارت مذہبی امور نے ڈی جی سول ایوی ایشن اتھارٹی کو مراسلہ جاری کرتے ہوئے بتایا کہ اس سال بھی اسلام آباد اور کراچی کے جناح ایئرپورٹ پر “روڈ ٹو مکہ” منصوبہ شامل ہے، جس سے دونوں ایئرپورٹس سے جانے والے عازمین فائدہ اٹھائیں گے۔ مراسلے میں سول ایوی ایشن اتھارٹی کو ہدایت کی گئی ہے کہ اسلام آباد اور کراچی ایئرپورٹس پر سعودی ایمیگریشن عملے کے لیے تمام انتظامات کیے جائیں تاکہ حجاج کرام کو سہولت فراہم کی جا سکے۔
