مری (اے بی این نیوز)مری جانے والے سیاحوں کے لیے ٹریفک پولیس نے اہم ہدایات جاری کی ہیں۔ چیف ٹریفک آفیسر مری، مغیث احمد ہاشمی نے بتایا کہ مری میں سیاحوں کی آمد کا سلسلہ عید الفطر کے دوران بھی جاری ہے، اور اس دوران ٹریفک پولیس کے 200 سے زائد اہلکار ڈیوٹی پر موجود ہیں۔
مغیث احمد ہاشمی نے کہا کہ مری میں تمام ٹریفک انتظامات کی نگرانی خود کر رہے ہیں۔ انہوں نے سیاحوں کو آگاہ کیا کہ بغیر ہیلمٹ کے موٹر سائیکل سواروں کو مری میں داخلے کی اجازت نہیں دی جائے گی۔
سی ٹی او مری نے مزید کہا کہ دو طرفہ ٹریفک اور تنگ سڑکوں کے باوجود مری کی تمام شاہراہوں پر ٹریفک رواں دواں ہے اور تمام راستے کھلے ہیں۔ ان کا کہنا تھا کہ سیاحوں کو اپنے سفر کو محفوظ اور خوشگوار بنانے کے لیے ٹریفک قوانین پر سختی سے عمل کرنا چاہیے۔
انہوں نے کہا کہ مری میں آنے والے سیاح پارکنگ صرف ٹریفک پولیس کی مختص کردہ جگہوں پر کریں اور ڈبل لائن بنانے یا غلط پارکنگ سے گریز کریں۔ مغیث احمد ہاشمی نے یہ بھی بتایا کہ مری میں “نو پارکنگ” کے خاتمے کے لیے پولیس کے افسران مسلسل پٹرولنگ کر رہے ہیں۔
