اسلام آباد ( اے بی این نیوز )وفاقی وزیر خزانہ سینیٹر محمد اورنگزیب نے کہا ہے کہ شرح سود میں مزید کمی متوقع ہے جب کہ وزیراعظم بھی جلد بجلی کی قیمتوں میں کمی کا اعلان کریں گے۔چین میں باؤ فورم کے دوران عالمی پبلشنگ اور براڈکاسٹنگ میگزین بلومبرگ کو انٹرویو دیتے ہوئے وزیر خزانہ نے کہا کہ حکومت کی توجہ معیشت کو بہتر بنانے پر ہے۔ آئندہ وفاقی بجٹ میں ٹیکسوں کا دائرہ کار بڑھانے پر توجہ دی جائے گی، رئیل اسٹیٹ، ریٹیل اور زراعت جیسے شعبوں کو ٹیکس نظام میں شامل کیا جائے گا۔
محمد اورنگزیب نے کہا کہ حکومت ملکی برآمدات بڑھانے کی حکمت عملی پر عمل پیرا ہے، وزیراعظم کی قیادت میں بجلی کی قیمتوں میں کمی کے لیے اقدامات کیے جارہے ہیں، وزیراعظم کی جانب سے اس حوالے سے جلد اعلان متوقع ہے۔ اس قدم سے مینوفیکچرنگ سیکٹر کو فروغ ملے گا اور برآمدات میں اضافہ ہوگا۔محمد اورنگزیب نے کہا کہ مینوفیکچرنگ سیکٹر پر غیر ضروری ٹیکسوں کا بوجھ ٹیکس کی بنیاد کو وسیع کرکے کم کرنا ہے، مینوفیکچرنگ سیکٹر اب تک ٹیکسز کا بڑا حصہ ادا کر رہا ہے۔
وزیر خزانہ نے مہنگائی کے رجحانات پر اطمینان کا اظہار کرتے ہوئے کہا کہ مجموعی اور بنیادی افراط زر کی سطح پر گہری نظر رکھی جا رہی ہے۔انہوں نے کہا کہ رواں سال کے دوران شرح سود میں مزید کمی متوقع ہے جس سے معاشی ترقی کے حالات مزید بہتر ہوں گے۔انہوں نے کہا کہ پاکستان اس کیلنڈر سال میں پہلا چینی یوآن بانڈ جاری کرنے کا ارادہ رکھتا ہے، یوآن بانڈ کی مالیت 200 سے 250 ملین ڈالر کے درمیان ہوگی۔
وزیر خزانہ نے کہا کہ بانڈ کا سائز اہم نہیں ہے تاہم اس کا مقصد فنڈنگ کے ذرائع کو متنوع بنانا ہے، یہ فنڈ موسمیاتی تبدیلی سے متعلق منصوبوں کے لیے استعمال کیا جائے گا۔یہ بھی پڑھیں: ہمیں اپنی معیشت کا ڈی این اے بدلنا ہوگا۔انہوں نے کہا کہ اس اقدام کا مقصد امریکہ، یورپ اور اسلامی سکوک کی روایتی منڈیوں سے ہٹ کر مالیاتی ذرائع کو متنوع بنانا ہے، یہ پاکستان کے لیے دنیا کی دوسری بڑی اور گہری کیپٹل مارکیٹ سے فائدہ اٹھانے کا مناسب وقت ہے۔
مزید پڑھیں :عمران خان سےبچوں کی بات کرانے کا فیصلہ،وکلاء ٹیم کو عدالتی احکامات لیکر جیل کے اندر جانے کی اجازت نہ مل سکی
