اسلام آباد ( اے بی این نیوز )وزیراعظم شہباز شریف نے پرائم منسٹر رمضان ریلیف پیکج 2025 کا تھرڈ پارٹی آڈٹ کرانے کی ہدایت کر دی ہے۔
وزیراعظم کی زیر صدارت پرائم منسٹر رمضان ریلیف پیکج 2025 کے حوالے سے جائزہ اجلاس ہوا، جس میں وفاقی وزیر قومی غذائی تحفظ رانا تنویر حسین، وفاقی وزیر اقتصادی امور احد خان چیمہ، وفاقی وزیر اطلاعات و نشریات عطا تارڑ، وفاقی وزیر انفارمیشن ٹیکنالوجی و ٹیلی کام شزا فاطمہ، وزیر پیٹرولیم علی پرویز ملک، معاون خصوصی ہارون اختر، چیئرمین نادرا اور چیئرمین پی ٹی اے نے شرکت کی۔
اجلاس کے دوران وزیراعظم کو رمضان ریلیف پیکج 2025 کی پیشرفت پر بریفنگ دی گئی، جس میں بتایا گیا کہ اب تک 63 فیصد مستحقین کو رقم پہنچائی جا چکی ہے اور ان تمام افراد کی دستاویزی تفصیلات موجود ہیں۔ وزیر اعظم کو یہ بھی بتایا گیا کہ رمضان ریلیف پیکج کے حوالے سے 2224 ملازمین ڈیوٹی پر مامور ہیں، اور ڈیڑھ ملین سے زیادہ مستحقین کو ٹیلی فون کالز کی جا چکی ہیں۔
وزیراعظم شہباز شریف نے رمضان ریلیف پیکج کا تھرڈ پارٹی آڈٹ کرانے کی ہدایت کرتے ہوئے کہا کہ یہ پیکج پورے پاکستان، بشمول گلگت بلتستان اور آزاد جموں و کشمیر، کے لیے بلا تفریق متعارف کروایا گیا ہے۔ انہوں نے اس بات پر بھی زور دیا کہ اس پیکج کو شفاف بنانے میں اسٹیٹ بینک آف پاکستان، نادرا اور دیگر ٹیک اداروں کی کاوشیں لائق تحسین ہیں، اور پیسے مستحقین تک ڈیجیٹل والٹ کے ذریعے انتہائی سہولت اور شفافیت کے ساتھ پہنچائے جا رہے ہیں۔
وزیراعظم نے ہدایت کی کہ اس ماڈل کو دیگر حکومتی اسکیموں میں اپنایا جائے اور رمضان ریلیف پیکج کے حوالے سے ٹیلی کام کمپنیوں اور بینکوں کی جانب سے چلائی جانے والی آگہی مہم کو مزید مؤثر بنانے کے لیے ایک جامع رپورٹ تیار کی جائے۔
